मुंबई: संपूर्ण देश प्रजासत्ताक दिनाचा (Prathamesh Kadam Death) जल्लोष साजरा करत असतानाच, आपल्या जबरदस्त डान्स आणि हटके व्हिडिओने लाखो लोकांच्या मनावर राज्य करणारा मराठमोळा रीलस्टार प्रथमेश कदम याचे दुःखद निधन झाले आहे. त्याचा जवळचा मित्र तन्मय पाटेकर याने सोशल मीडियाद्वारे ही माहिती देताच चाहत्यांवर शोककळा पसरली आहे.
मुंबईचा रहिवासी असलेल्या प्रथमेशचे इन्स्टाग्रामवर १ लाख ८६ हजारांहून अधिक फॉलोअर्स होते. त्याच्या यशात त्याची आई प्रज्ञा कदम यांचा मोठा वाटा होता. आई-लेकाची डान्स केमिस्ट्री आणि त्यांचे विनोदी व्हिडिओ नेटकऱ्यांमध्ये प्रचंड लोकप्रिय होते. प्रज्ञा कदम यांचेही सोशल मीडियावर मोठे चाहते आहेत. या माय-लेकाच्या जोडीने मध्यमवर्गीय मराठी कुटुंबाचे चांगलेच मनोरंजन केले होते.
प्रथमेशच्या मृत्यूचे नेमके कारण अद्याप अधिकृतपणे स्पष्ट झालेले नाही. मात्र, डिसेंबर २०२५ मध्ये त्याने एक व्हिडिओ पोस्ट करून आपली मोठी आर्थिक फसवणूक झाल्याचे सांगितले होते, ज्यामुळे तो काहीसा तणावात असल्याची चर्चा होती.
