डोर्लेवाडी : कर्मवीर भाऊराव पाटील यांनी सर्वसामान्यांसाठी शिक्षणाची दारे खुली करून सामाजिक परिवर्तनाची चळवळ उभी केली. मात्र, त्यांच्याच जयंतीनिमित्त डोर्लेवाडीत (ता. बारामती) आयोजित कार्यक्रमाला निमंत्रणपत्रिकेतील नावांवरून निर्माण झालेल्या वादाचे गालबोट लागल्याची चर्चा रंगली. स्थानिक स्कूल कमिटी, ग्रामपंचायत पदाधिकारी आणि एका राजकीय पक्षाच्या पदाधिकाऱ्यांमध्ये नावांचा समावेश करण्यावरून नाराजी निर्माण झाली. अखेर अनेक बैठका आणि नाराजांची मनधरणी केल्यानंतर कार्यक्रम पार पडला. या पार्श्वभूमीवर युवा नेते युगेंद्र पवार यांनी शाळेच्या आवारात राजकारण न करता विद्यार्थ्यांच्या शैक्षणिक विकासाला प्राधान्य देण्याचे आवाहन केले.
डोर्लेवाडी येथे कर्मवीर भाऊराव पाटील यांच्या जयंतीनिमित्त आयोजित कार्यक्रमात युगेंद्र पवार बोलत होते. कर्मवीरांनी अत्यंत प्रतिकूल परिस्थितीत ग्रामीण आणि तळागाळातील विद्यार्थ्यांना शिक्षण मिळावे, या उद्देशाने रयत शिक्षण संस्थेची उभारणी केली. त्यांच्या कार्यामुळे अनेक पिढ्यांना शिक्षणाची संधी मिळाली आणि सामाजिक परिवर्तनाला चालना मिळाली, असे प्रतिपादन पवार यांनी केले.
रयत शिक्षण संस्था आणि ज्येष्ठ नेते शरद पवार यांचे जुने नाते असल्याचा उल्लेख करताना, शरद पवार यांचे शिक्षण रयत शिक्षण संस्थेच्या शाळेत झाले असून त्यांचा विवाहही संस्थेच्या प्रांगणात झाला असल्याचे त्यांनी सांगितले. शाळा हे शिक्षणासोबत संस्कारांचे केंद्र असल्याने शाळेच्या आवारात राजकारण होऊ नये, असेही त्यांनी स्पष्ट केले.
निमंत्रणपत्रिकेतील नावांवरून वाद
कार्यक्रमाच्या आयोजनादरम्यान निमंत्रणपत्रिकेतील नावांवरून स्थानिक पदाधिकारी आणि कार्यकर्त्यांमध्ये मतभेद झाल्याची चर्चा गावात होती. एका माजी कारखाना संचालकाचे नाव निमंत्रणपत्रिकेत छापले नसल्याने, नंतर हाताने नाव लिहून पत्रिका वितरित करण्यात आल्याचा आरोप आहे. यावरून संबंधित संचालकांचे पुत्र आणि काही ग्रामस्थांनी पोलिस ठाण्यात लेखी तक्रार दिल्याचे समजते. त्यामुळे पोलिस अधिकाऱ्यांना या प्रकरणात हस्तक्षेप करावा लागल्याची माहिती आहे. या वादावर तोडगा काढण्यासाठी रविवारी सकाळपासून रात्रीपर्यंत अनेक बैठका झाल्या. नाराज संचालकांची सार्वजनिक कार्यक्रमात दिलगिरी व्यक्त करण्याच्या अटीवर मनधरणी करण्यात आल्याची चर्चा आहे. त्यानंतर कार्यक्रमातील संभाव्य अडथळा दूर झाला.
नवीन शाळेच्या इमारतीचे आश्वासन
डोर्लेवाडी येथील शाळेची सध्याची इमारत जुनी झाली असून, विद्यार्थ्यांच्या सोयीसाठी नवीन इमारत उभारण्याचे नियोजन असल्याचे युगेंद्र पवार यांनी सांगितले. या कामाला लवकरच सुरुवात करून पुढील वर्षी कर्मवीर भाऊराव पाटील जयंतीचा कार्यक्रम नवीन इमारतीत घेण्यासाठी प्रयत्न करणार असल्याचे आश्वासन त्यांनी दिले.
दरम्यान, रयत शिक्षण संस्थेच्या कार्यकारिणीवर निवड झाल्याबद्दल युगेंद्र पवार यांचा ग्रामस्थांच्या वतीने सत्कार करण्यात आला. यावेळी सरपंच सुप्रिया मनोज नाळे, उपसरपंच राहुल भोपळे, मुख्याध्यापक तुकाराम खताळ,माजी सभापती अशोक नवले, छत्रपती साखर कारखान्याचे संचालक संतोष मासाळ, भगवान क्षीरसागर,डॉ. मोहन नेवसे, सुनील म्हेत्रे, कांतीलाल नाळे, रुपाली लोणकर, अॅड. अतुल भोपळे, स्थानिक स्कूल कमिटी सदस्य बापूराव गवळी, यशोदीप नाळे, गजानन नाळे, दिलीप गाडे आदी उपस्थित होते.यांच्यासह ग्रामपंचायत सदस्य, पदाधिकारी, शिक्षक, विद्यार्थी आणि ग्रामस्थ उपस्थित होते.
