पुणे : महाराष्ट्र विधान परिषदेच्या पदवीधर आणि शिक्षक मतदारसंघांच्या आगामी निवडणुकीच्या पार्श्वभूमीवर महायुतीतील जागावाटपाच्या चर्चांना वेग आला आहे. पाच मतदारसंघांमध्ये होणाऱ्या या निवडणुकीसाठी महायुतीमध्ये 3-1-1 असा जागावाटपाचा फॉर्म्युला चर्चेत असल्याचे समोर आले आहे. मात्र, पुणे शिक्षक मतदारसंघाच्या जागेवरून भाजप आणि शिवसेना यांच्यातील तिढा अद्याप कायम असल्याचे वृत्त आहे. त्यामुळे अंतिम जागावाटपाकडे राजकीय वर्तुळाचे लक्ष लागले आहे.
चर्चेत असलेल्या फॉर्म्युल्यानुसार छत्रपती संभाजीनगर पदवीधर मतदारसंघाची जागा राष्ट्रवादी काँग्रेसच्या अजित पवार गटाकडे, अमरावती शिक्षक मतदारसंघाची जागा शिवसेना शिंदे गटाकडे, तर नागपूर आणि पुणे पदवीधर मतदारसंघाच्या जागा भाजपकडे जाण्याची शक्यता व्यक्त केली जात आहे. पुणे शिक्षक मतदारसंघाच्या जागेवर मात्र अद्याप एकमत झालेले नसल्याचे सांगितले जात आहे.
पुणे शिक्षक मतदारसंघासाठी शिवसेना शिंदे गटाकडूनही जोरदार दावा केला जात आहे. मंगेश चिवटे आणि सचिन सानप यांची नावे इच्छुक म्हणून चर्चेत असल्याचे वृत्त आहे. दुसरीकडे भाजपकडूनही या जागेसाठी इच्छुकांची नावे चर्चेत असल्याने महायुतीमध्ये जागावाटपाचा प्रश्न निर्माण झाला आहे. या जागेवर कोणत्या पक्षाला संधी मिळते, याकडे लक्ष लागले आहे.
दरम्यान, महाराष्ट्र विधान परिषदेच्या तीन पदवीधर आणि दोन शिक्षक मतदारसंघांसाठी निवडणूक कार्यक्रम जाहीर झाला आहे. 29 सप्टेंबर 2026 रोजी अधिसूचना जारी करण्यात आली असून 6 ऑक्टोबरपर्यंत उमेदवारी अर्ज दाखल करता येणार आहेत. 7 ऑक्टोबरला अर्जांची छाननी, तर 9 ऑक्टोबरला अर्ज मागे घेण्याची अंतिम मुदत आहे. 23 ऑक्टोबर रोजी सकाळी 8 ते दुपारी 4 या वेळेत मतदान होणार असून 27 ऑक्टोबरला मतमोजणी होणार आहे.
या निवडणुकीत छत्रपती संभाजीनगर पदवीधर, पुणे पदवीधर, नागपूर पदवीधर, अमरावती शिक्षक आणि पुणे शिक्षक या पाच मतदारसंघांचा समावेश आहे. सध्या छत्रपती संभाजीनगर मतदारसंघाचे सतीश चव्हाण, पुणे पदवीधरचे अरुण लाड, नागपूर पदवीधरचे अभिजीत वंजारी, अमरावती शिक्षकचे किरण सरनाईक आणि पुणे शिक्षकचे जयंत आसगावकर हे प्रतिनिधित्व करतात.
उमेदवारी अर्ज दाखल करण्याची अंतिम तारीख जवळ आल्याने महायुतीतील जागावाटपाबाबतच्या चर्चांना आणखी वेग येण्याची शक्यता आहे. विशेषतः पुणे शिक्षक मतदारसंघाचा निर्णय कोणाच्या बाजूने होतो, याकडे सर्वांचे लक्ष लागले आहे.
