सांगली : गेल्या काही दिवसांपासून सांगली जिल्ह्यातील विविध भागांत बिबट्याचा वावर वाढला असून, पलूस तालुक्यातील आंधळी येथे सोमवारी सायंकाळी बिबट्याचा थरार अनुभवायला मिळाला. बिबट्या घराच्या दारात येऊन कुत्र्यावर झडप घालण्याच्या तयारीत असताना नातीने प्रसंगावधान दाखवत कुत्र्याला घरात ओढून घेतले. त्यामुळे 90 वर्षांच्या आजी-आजोबांसह कुत्र्याचाही जीव वाचला. या घटनेनंतर समृद्धी संभाजी पाटील (वय 24, रा. बोरगाव, ता. वाळवा) हिचे कौतुक होत असून परिसरात भीतीचे वातावरण निर्माण झाले आहे.
पलूस तालुक्यातील आंधळी गावापासून सुमारे दोन किलोमीटर अंतरावर कुरण वस्ती आहे. या ठिकाणी जयसिंग यशवंत माने आणि बबूताई जयसिंग माने हे वृद्ध दाम्पत्य राहते. आजी-आजोबांची देखभाल करण्यासाठी त्यांची नात समृद्धी पाटील ही त्यांच्यासोबतच राहते. सोमवारी सायंकाळी पावणेसातच्या सुमारास बबूताई स्वयंपाकघरात समृद्धीला मदत करत होत्या. तर जयसिंग माने बाहेरील खोलीत झोपले होते.
याच वेळी घराच्या दरवाजाजवळ बसलेला कुत्रा अचानक जोरात भुंकू लागला. समृद्धीने दरवाजाकडे पाहिले असता तिला समोर बिबट्या उभा असल्याचे दिसले. बिबट्या कुत्र्यावर हल्ला करण्याच्या तयारीत होता. परिस्थितीचे गांभीर्य लक्षात येताच समृद्धीने क्षणाचाही विलंब न करता कुत्र्याला घराच्या आत ओढून घेतले आणि दरवाजा आतून घट्ट धरून ठेवला.
कुत्र्याला घरात घेतल्यानंतर बिबट्याने दरवाजावर जोरदार धडक दिली. मात्र, दरवाजा आतून बंद असल्याने बिबट्याला घरात प्रवेश करता आला नाही. काही वेळाने बिबट्याने तेथून पळ काढला. या घटनेमुळे समृद्धीसह आजी-आजोबांचीही मोठी घाबरगुंडी उडाली.
दरम्यान, मंगळवारी पुन्हा माने वस्ती परिसरात बिबट्याने एका कुत्र्यावर हल्ला केल्याचे समोर आले आहे. त्यामुळे परिसरातील नागरिकांमध्ये भीतीचे वातावरण आहे. बिबट्याचा वावर वाढत असल्याने वनविभागाने परिसरात गस्त वाढवून बिबट्याचा शोध घ्यावा आणि आवश्यक ठिकाणी पिंजरा अथवा ट्रॅप लावून त्याचा बंदोबस्त करावा, अशी मागणी नागरिकांकडून होत आहे.
