मुंबई : ठाण्यात शिवसेनेचे (ठाकरे गट) विभागप्रमुख प्रदीप पूर्णेकर यांच्या हत्येप्रकरणी पूर्णेकर यांच्या पत्नी वैजयंती पूर्णेकर यांनी शिंदे गटाच्या नेत्या आणि ठाण्याच्या माजी महापौर मीनाक्षी शिंदे यांच्यावर थेट आरोप केले आहेत. या आरोपांनंतर ठाकरे गटाचे खासदार संजय राऊत यांनी मीनाक्षी शिंदे यांची एक कथित ऑडिओ क्लिप सोशल मीडियावर पोस्ट केली आहे त्यामुळे राजकीय वर्तुळात खळबळ उडाली आहे.
खासदार संजय राऊत यांनी या ऑडिओ क्लिपचा हवाला देत त्यांना ‘ठाण्याची लेडी डॉन’ संबोधले असून, या हत्येमागे त्यांचाच हात असल्याचा दाट संशय व्यक्त केला आहे.शिवसेना नेते आदित्य ठाकरे आणि खासदार संजय राऊत यांनी बुधवारी ठाणे पोलीस आयुक्तांची भेट घेतली. मीनाक्षी शिंदे यांच्यावर गुन्हा दाखल झाल्याशिवाय पोलीस ठाण्यातून हटणार नाही, अशी आक्रमक भूमिका त्यांनी घेतली. ठाकरे आणि राऊत यांच्या या पवित्र्यानंतर ठाणे पोलिसांनी अखेर मीनाक्षी शिंदे यांच्याविरोधात गुन्हा दाखल केला आहे.
दुसरीकडे, मीनाक्षी शिंदे माध्यमांशी बोलण्याची तयारी करत असतानाच संजय राऊत यांनी पुन्हा एकदा पोलीस प्रशासनावर प्रश्न उपस्थित केले. पोलिसांनी अजून कोणता पुरावा हवा आहे, असा सवाल करत त्यांनी मीनाक्षी शिंदे यांच्या तात्काळ अटकेची मागणी केली. राऊत यांनी आरोप केला की, संबंधित ऑडिओ क्लिपमध्ये पोलीस आयुक्तांचा धाक दाखवून विरोधकांना संपवण्याची आणि पूर्णेकर यांच्या घरात गुंड पाठवून त्यांना मारण्याची भाषा वापरली गेली आहे.
महाराष्ट्राची कायदा आणि सुव्यवस्था बिघडल्याची टीका करत राऊत यांनी ठाण्याची तुलना बीडशी केली. ही लेडी डॉन कोणाच्या आशीर्वादाने वाचत आहे असा सवाल करत त्यांनी ठाणेकरांना रस्त्यावर उतरून विरोध दर्शवण्याचे आवाहन केले आहे.
