Indapur News : इंदापूर, ता. 25 : इंदापूर तालुक्यातील बाभुळगाव (ता. इंदापूर, जि. पुणे) येथून आदमापूर येथे बाळुमामाचे दर्शन घेण्यासाठी निघालेले तरुण पती-पत्नी तब्बल आठ दिवस उलटूनही अद्याप बेपत्ता (Missing) असल्याने तालुक्यात खळबळ उडाली आहे.
आकाश तुकाराम वाईकर (वय 28) व त्याची पत्नी निकीता आकाश वाईकर (वय 20) यांचा कोणताही ठावठिकाणा न लागल्याने पोलिसांसमोर शोधाचे मोठे आव्हान उभे राहिले आहे. या प्रकरणी आकाशची आई संगिता तुकाराम वाईकर (वय 45, व्यवसाय – मजुरी, रा. बाभुळगाव) यांनी इंदापूर पोलीस ठाण्यात बेपत्ता झाल्याची तक्रार दाखल केली आहे.
मिळालेल्या माहितीनुसार, आकाश हा अकलुज येथील आर.बी.एल. प्रा. लि. फायनान्स कंपनीत कार्यरत आहे. दि. 18 जानेवारी 2026 रोजी सकाळी साडेआठच्या सुमारास संगिता वाईकर व त्यांचे पती मजुरीच्या कामासाठी घराबाहेर पडले होते. त्यावेळी घरात आकाश व निकीता हे दोघेच उपस्थित होते. दुपारी साडेतीनच्या सुमारास आकाश याने आईला फोन करून “आम्ही दोघे आदमापूर येथे बाळुमामाचे दर्शन घेण्यासाठी जात आहोत,” असे सांगितले.
त्याच दिवशी सायंकाळी सातच्या सुमारास आकाश याचा पुन्हा फोन आला. “आम्ही देवदर्शनासाठी निघालो आहोत, तुम्ही जेवण करून घ्या,” असे सांगून त्याने फोन बंद केला. मात्र, दुसऱ्या दिवशी 19 जानेवारीपासून आकाशचा मोबाईल क्रमांक सतत बंद लागत असल्याने कुटुंबीयांची चिंता अधिकच वाढली. दिवसभर प्रयत्न करूनही संपर्क न झाल्याने आकाश व निकीता हे दोघे आदमापूर येथे न जाता कुठेतरी अज्ञात ठिकाणी निघून गेल्याचा संशय व्यक्त केला जात आहे. आठ दिवस उलटूनही कोणताही मागमूस न लागल्याने या प्रकरणाला संशयाचे गडद सावट आले आहे.
अखेर इंदापूर पोलीस ठाण्यात खबरी जबाब दाखल करण्यात आला असून पोलीस विविध दिशांनी तपास करत आहेत. नागरिकांनी या दाम्पत्याबाबत कोणतीही माहिती मिळाल्यास त्वरित इंदापूर पोलीस ठाण्याशी संपर्क साधण्याचे आवाहन पोलिसांनी केले आहे.
