मुंबई : बॉलीवूडच्या एव्हरग्रीन अभिनेत्री नीतू कपूर आणि झीनत अमान यांनी नुकतीच करण जोहरच्याकॉफी विथ करण शोच्या आठव्या पर्वात हजेरी लावली. या भागात नीतू कपूर यांनी वैयक्तिक आयुष्य व पती ऋषी कपूर यांच्याबद्दलचे अनेक किस्से शेअर केले. ऋषी कपूर बॉयफ्रेंड, पती, वडील म्हणून कसे होते ते नीतू कपूर यांनी सांगितले.
ऋषी कपूर शेवटच्या दिवसांमध्ये ल्युकेमिया या आजारावर उपचार घेत होते. याविषयी सांगताना नीतू कपूर म्हणाल्या, “आयुष्यातील दु:खद घटना मी फारशा आठवत नाही. पण, आम्ही दोघांनी एकत्र न्यूयॉर्कमध्ये जो वेळ घालवला ते सगळे क्षण आजही मला आठवतात. त्या दिवसांत आम्ही दोघं एकत्र होतो ही माझ्यासाठी खूप मोठी गोष्ट होती. शेवटच्या दिवसांत या सगळ्या गोष्टी बदलल्या. त्यांनी व्यक्त व्हायला सुरुवात केली. त्यांच्या मनातलं प्रेम दाखवलं म्हणूनच तो काळ मी कधीच विसरू शकणार नाही.”
कडक शिस्तीचे बॉयफ्रेंड होते, असे सांगताना त्या म्हणाल्याकी, “सुरुवातीच्या काळात मी जेव्हा यश चोप्रांबरोबर शूटिंग करायचे तेव्हा रात्री उशिरा पार्ट्या व्हायच्या. मी तेव्हा कोणत्याही पार्टीला जायचे नाही. कारण, ते (ऋषी कपूर) मला नेहमी सांगायचे घरी जा…पार्ट्यांमध्ये जाण्यास त्यांनी मनाई केली होती. माझं पार्टी करणं थांबवलं होतं. मी काय करायचं, काय नाही, एखादी गोष्ट करायची की नाही, अशा प्रत्येक गोष्टीत ते पडायचे. तेव्हा माझ्या आयुष्यात दोन शिस्तबद्ध माणसं होती एक माझी आणि आणि दुसरे कडक शिस्तीचे माझे बॉयफ्रेंड ऋषी कपूर. यामुळे मी आयुष्यात कधीच पार्ट्यांना गेले नाही.”
ऋषी कपूर यांचं मुलगा रणबीर आणि लेक रिद्धिमाशी असलेल्या बॉण्डिंगबद्दल सांगताना नीतू कपूर म्हणाल्या, “घरी मुलांशी ते क्वचित कधीतरी मैत्रीपूर्वक वागायचे. लोकांवर प्रेम करायला त्यांना फार आवडायचं. पण, त्यांनी कधीच त्यांच्या मनातलं प्रेम सर्वांसमोर व्यक्त केलं नाही. नेहमी अंतर राखून वागायचे, काही वेळा ओरडायचे. त्यांना सगळ्यांबद्दल फक्त मनोमन आपुलकी वाटायची. यामुळे मुलांसह त्यांनी बऱ्याच गोष्टी गमावल्या. ते कधीच दोन्ही मुलांचे चांगले मित्र होऊ शकले नाहीत.”
