पुणे : नागराज मंजुळे दिग्दर्शित आगामी ‘खाशाबा’ या चित्रपटाचा दमदार टीझर नुकताच प्रेक्षकांच्या भेटीस आला असून, सध्या सोशल मीडियावर याचीच जोरदार चर्चा सुरू आहे. सैराटसारखा सुपरहिट सिनेमा देणाऱ्या नागराज यांच्या या नव्या प्रोजेक्टबद्दल प्रेक्षकांमध्ये कमालीची उत्सुकता आहे. या चित्रपटात महेश मांजरेकर, गिरीश कुलकर्णी आणि स्वतः नागराज मंजुळे यांच्या मुख्य भूमिका आहेत. पण या सगळ्यात टीझरमधील एका खास चेहऱ्याने सर्वांचे लक्ष वेधून घेतले आहे, त्या म्हणजे नागराज मंजुळे यांच्या पत्नी गार्गी कुलकर्णी.
गार्गी कुलकर्णी या ‘खाशाबा’ चित्रपटाच्या माध्यमातून पहिल्यांदाच मोठ्या पडद्यावर अभिनय करताना दिसणार आहेत. विशेष म्हणजे, नागराज आणि गार्गी हे दोघे पहिल्यांदाच रुपेरी पडद्यावर एकत्र स्क्रीन शेअर करणार आहेत. गार्गी या नेहमीच लाईमलाईट आणि प्रसिद्धीपासून दूर राहणे पसंत करतात, त्यामुळे त्यांना पडद्यावर पाहण्यासाठी चाहते उत्सुक आहेत.
मूळच्या अहमदनगरच्या असलेल्या गार्गी कुलकर्णी आणि नागराज मंजुळे यांचा विवाह 2017 मध्ये झाला होता. गार्गी या केवळ नागराज यांच्या जोडीदार नसून त्यांच्या निर्मिती संस्थेचा एक मुख्य आधारस्तंभ आहेत. त्यांनी आजवर पडद्यामागे राहून अनेक महत्त्वाच्या जबाबदाऱ्या सांभाळल्या आहेत. ‘फँड्री’, ‘सैराट’, ‘झुंड’, ‘घर बंदूक बिर्याणी’ आणि ‘नाळ २’ यांसारख्या गाजलेल्या चित्रपटांमध्ये त्यांनी कॉस्च्युम डिझायनिंग (वेशभूषा) आणि एक्झिक्युटिव्ह प्रोड्युसर म्हणून काम पाहिले आहे.
गार्गी यांना वाचन, लेखन आणि कवितांची प्रचंड आवड आहे. साहित्याची उत्तम जाण असल्यामुळे नागराज मंजुळे आपल्या प्रत्येक नव्या सिनेमाची स्क्रिप्ट सर्वात आधी गार्गी यांनाच वाचायला देतात, असे त्यांनी एका मुलाखतीत सांगितले होते. आतापर्यंत पडद्यामागून चित्रपटाची धुरा सांभाळणाऱ्या गार्गी यांना ‘खाशाबा’ सिनेमात थेट अभिनयाच्या मैदानात पाहणे प्रेक्षकांसाठी नक्कीच एक सुखद धक्का असणार आहे.
