मुंबई: अंधेरीतील (KRK Arrested) लोखंडवाला परिसरात असलेल्या नालंदा सोसायटीत झालेल्या रहस्यमय गोळीबाराचा छडा लावण्यात मुंबई पोलिसांना यश आले आहे. या प्रकरणाचे सर्वात मोठे वैशिष्ट्य म्हणजे, कोणताही प्रत्यक्षदर्शी साक्षीदार किंवा स्पष्ट सीसीटीव्ही फुटेज उपलब्ध नसताना, पोलिसांनी ‘कृत्रिम बुद्धिमत्ता’ (AI) तंत्रज्ञानाचा वापर करून अभिनेता कमाल आर. खान (KRK) याच्या मुसक्या आवळल्या आहेत.
१८ जानेवारी २०२६ रोजी नालंदा सोसायटीतील दुसऱ्या आणि चौथ्या मजल्यावरील दोन फ्लॅट्समध्ये अचानक गोळीबार झाल्याने खळबळ उडाली होती. भरवस्तीत गोळीबार झाल्याने रहिवाशांमध्ये भीतीचे वातावरण होते. गोळी कुठून आली आणि कोणी झाडली? याचा कोणताही सुगावा लागत नव्हता.
पारंपारिक तपासात अपयश येत असल्याचे पाहून ओशिवारा पोलिसांनी AI आधारित डिजिटल फॉरेन्सिक मदतीचा आधार घेतला. एआय प्रणालीने गोळीचा मार्ग, आवाजाची तीव्रता आणि गोळीबाराची दिशा यांचे ‘डिजिटल रिकन्स्ट्रक्शन’ केले. या तांत्रिक विश्लेषणाने स्पष्ट केले की, या गोळ्या नेमक्या कमाल आर. खान याच्या घराच्या दिशेकडून झाडल्या गेल्या होत्या.
केआरकेकडे अधिकृत पिस्तूल असल्याची माहिती पोलिसांकडे आधीच होती. एआयने दिलेल्या ‘रेंज’ आणि अंतराच्या पुराव्यामुळे तपासाची सुई थेट अभिनेत्याकडे वळली. सखोल चौकशीनंतर पोलिसांनी केआरकेला बेड्या ठोकल्या.
