Pune Crime: पिंपरी-चिंचवड : पिंपरी-चिंचवड शहरातील हिंजवडी परिसरात नो-पार्किंग झोनमध्ये वाहन उचलण्याच्या कारवाईदरम्यान झालेल्या वादातून हाणामारीची घटना समोर आली आहे. शनिवारी संध्याकाळी ही घटना घडली असून टोइंग करणाऱ्या व्यक्तीने स्थानिक रहिवाशावर हेल्मेटने हल्ला केल्याने परिसरात तणावाचे वातावरण निर्माण झाले.
या प्रकरणी तेजस भाऊसाहेब आहेर (वय 31, रा. वाकड, मूळ नाशिक) यांनी हिंजवडी पोलिस ठाण्यात तक्रार दिली आहे. त्यांच्या तक्रारीनुसार, त्यांनी आपली होंडा एसपी 125 दुचाकी वाकड-हिंजवडी रोडवरील एका रेस्टॉरंटजवळ पार्क केली होती. हा परिसर वर्दळीचा असल्याने नो-पार्किंग झोनमध्ये येतो. सायंकाळी सुमारे 6.45 वाजता पिंपरी-चिंचवड पोलिस आयुक्तालयाच्या वाहतूक विभागाचे टोइंग वाहन तेथे आले.
टोइंग कारवाईदरम्यान टोइंग ऑपरेटर आणि तक्रारदार यांच्यात वाद झाला. वाद वाढत गेल्याने हाणामारी झाली. या दरम्यान टोइंग ऑपरेटर ऋषिकेश पवार (वय 27) याने तक्रारदाराच्या डोक्यात हेल्मेटने वार केल्याचा आरोप आहे. तसेच तक्रारदार आणि त्याच्या पत्नीला शिवीगाळ केल्याचेही तक्रारीत नमूद करण्यात आले आहे.
तक्रारदाराच्या पत्नीने हा प्रकार मोबाईलमध्ये रेकॉर्ड करण्याचा प्रयत्न केला असता, आरोपीने तिचा मोबाईल हिसकावून रस्त्यावर फेकल्याचे सांगण्यात आले आहे. या घटनेमुळे परिसरात काही काळ गोंधळाची परिस्थिती निर्माण झाली होती.
हिंजवडी पोलिसांनी या प्रकरणी गुन्हा दाखल केला असून आरोपीविरुद्ध भारतीय न्याय संहितेतील संबंधित कलमे लावण्यात आली आहेत. आरोपी सध्या फरार असून त्याचा शोध सुरू आहे. या घटनेचा पुढील तपास सहाय्यक पोलिस निरीक्षक वांगणेकर करत आहेत. तसेच वाहतूक विभागाकडून अंतर्गत चौकशी सुरू असल्याची माहिती पोलिसांनी दिली आहे.
