(Bhagyashree Mote ) पुणे : मराठी चित्रपटसृष्टीमधील प्रसिद्ध अभिनेत्री भाग्यश्री मोटे हिची मोठी बहिण मधू मार्कंडेय हिचा वाकड परिसरात संशयास्पद मृत्यू झाला आहे. तिच्या चेहऱ्यावर काही जखमा आढळल्या आहेत. भाग्यश्री मोटे हिच्या कुटुंबियांनी हा घातपात असल्याचे म्हटले आहे. तर याप्रकरणी वाकड पोलिसांनी तपास सुरु केला आहे.
पुण्यात केक तयार करण्याचा बिझनेस…!
पोलिसांनी दिलेल्या माहितीनुसार, भाग्यश्री मोटे हिची बहीण मधू मार्कंडेय ही पिंपरी चिंचवड येथील वाकड येथे राहण्यास आहे. मधू मार्कंडेय ही केक तयार करण्याचा बिझनेस करायची आणि त्या बिझनेसमध्ये तिची एक पार्टनर देखील आहे.
मधू मार्कंडेय आणि तिची मैत्रीण रविवारी बिझनेससाठी एक भाड्याने रूम बघण्यासाठी गेल्या होत्या. तिथे मधूला अचानक चक्कर आल्याने खाली कोसळली. दातखिळी देखील बसल्याने मैत्रिणीने ती काढण्याचा प्रयत्न केला. मधूला तिच्या मैत्रिणीने तातडीने खासगी रुग्णालयात घेऊन गेली. परंतु, मधूला महानगर पालिकेच्या यशवंतराव चव्हाण स्मृती रुग्णालयात घेऊन जाण्यास सांगितले. मधूला यशवंतराव चव्हाण स्मृती रुग्णालयात उपचारासाठी दाखल केले असता, तेथील डॉक्टरांनी उपचारापूर्वीच मृत्यू झाला असल्याचे घोषित केले.
दरम्यान, मधू मार्कंडेयच्या मृत्यूनंतर भाग्यश्री मोटे हिच्या कुटुंबियांनी मोठा आरोप करत हा मृत्यू नसून हा घातपात असल्याचे म्हटले आहे. आता या प्रकरणातील तपास पोलिसांनी सुरू केला आहे. पुढे काही मोठे खुलासे होण्याची दाट शक्यता व्यक्त केली जातेय. या प्रकरणात विविध चर्चा रंगताना देखील दिसत आहेत. मात्र वाकड पोलिसांनी तिच्या शरीरावर गंभीर दुखापत नाही असे सांगितले आहे आणि याप्रकरणी पोलीस ठाण्यात अकस्मात मृत्यूची नोंद केली आहे.
याबाबत बोलताना मधूच्या मामाचा मुलगा संतोष पोकळे म्हणाला कि, मधूचा घातपात झाला असावा असा आमचा संशय आहे. पंधरा दिवसांपूर्वी तिच्या पतीचे निधन झाले असून ती दोन मुलांसह राहाटणीत राहत होती. तिच्यासोबत गेलेली मैत्रीण आम्हा कोणाला माहीत नाही. म्हणून आम्हाला तिच्या मृत्यूविषयी संशय आहे.
अधिक बातम्या वाचण्यासाठी येथे क्लिक करा…
Entertainment News : मराठी अभिनेत्रीला जीवे मारण्याच्या धमक्या!
