लहू चव्हाण
पाचगणी : पाचगणी येथील अभिनेता अमीर खान यांच्या बंगल्यासमोरील झाडाची फांदी नागरिकांना धोकादायक ठरत आहे.
सुरुर- पोलादपूर राज्य मार्गावर पाचगणी येथे एका झाडाची फांदी अर्धवट तुटली आहे.यामुळे नागरिकांना तेथून प्रवास करताना नागरिकांच्या डोक्यावर टांगती तलवार लटकर आहे.
एका जबाबदार नागरिकाने सोशल मीडियावर एक व्हिडिओ टाकून या धोकादायक फांदीकडे लक्ष वेधण्याचा प्रयत्न केला. परंतु, सार्वजनिक बांधकाम विभागाला अद्यापही जाग आलेली नाही.
मुख्य रस्त्यावर असणाऱ्या अभिनेता अमीर खान यांच्या घरासमोरील एका झाडाची फांदी धोकादायक झाल्याने या रस्त्यावरून ये-जा करणा-या प्रवासांना जीव मुठीत घेऊन प्रवास करावा लागत आहे.
यामुळे स्थानिक नागरिक व प्रवाशांमधून संताप व्यक्त होत आहे.
दरम्यान, पाचगणी परिसरात पावसाची संततधार सुरू असल्याने रस्त्यालगत डोंगरमाथ्यावरुन कोसळणारे धबधबे या निसर्गरम्य सौंदर्याचा आनंद लुटण्यासाठी पर्यटक दुचाकी,चारचाकीमधून मोठ्या संख्येने दाखल होत आहेत. त्यामुळे पाचगणीत पावसाळी पर्यटकांची संख्या वाढली आहे.
जून २०१९ मध्ये याच ठिकाणी दुचाकीवर झाडाची फांदी पडून पर्यटक महिलेचा जागीच मृत्यू झाला होता. मृत्यूच्या घटना घडत असतानाही सार्वजनिक बांधकाम विभाग निद्रिस्त असल्याने नागरिकांच्या रोषाला बांधकाम विभागाला सामोरे जावे लागत आहे.
