महाराष्ट्रातील दहावी आणि बारावीच्या विद्यार्थ्यांसाठी (SSC HSC Board Exam Schedule)मोठी बातमी समोर आली आहे. महाराष्ट्र राज्य माध्यमिक व उच्च माध्यमिक शिक्षण मंडळाने (MSBSHSE) अखेर 2026 च्या बोर्ड परीक्षांचे वेळापत्रक जाहीर केले आहे. यावर्षीच्या परीक्षांना नेहमीपेक्षा दोन आठवडे आधी सुरुवात होणार आहे.
जाहीर वेळापत्रकानुसार, बारावीची परीक्षा 10 फेब्रुवारी ते 18 मार्च 2026 या कालावधीत होणार आहे, तर दहावीची परीक्षा 20 फेब्रुवारी ते 18 मार्च 2026 दरम्यान पार पडेल. राज्यातील पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण या नऊ विभागांमध्ये परीक्षा एकाच वेळापत्रकानुसार घेतली जाणार आहे.
प्रात्यक्षिक परीक्षांच्या तारखा
बारावीच्या प्रात्यक्षिक, श्रेणी, तोंडी आणि अंतर्गत मूल्यमापनाच्या परीक्षा 23 जानेवारी ते 9 फेब्रुवारी 2026 या कालावधीत घेण्यात येतील.तर दहावीच्या प्रात्यक्षिक परीक्षा 2 फेब्रुवारी ते 18 फेब्रुवारी दरम्यान होतील. यात शरीरशास्त्र, आरोग्यशास्त्र, गृहशास्त्र आणि माहिती तंत्रज्ञानासह सर्व प्रात्यक्षिक विषयांचा समावेश आहे.
विद्यार्थ्यांचा ताण कमी करण्याचा उद्देश
राज्य मंडळाचे सहसचिव प्रमोद गोफणे यांनी सांगितले की, वेळापत्रक आधीच जाहीर करण्यामागे उद्देश शाळा आणि कनिष्ठ महाविद्यालयांना अभ्यासक्रम नियोजनासाठी वेळ देणे आणि विद्यार्थ्यांचा ताण कमी करणे हा आहे.
“विद्यार्थ्यांना आत्मविश्वासाने तयारी करता यावी, म्हणून परीक्षांचे वेळापत्रक आधीच उपलब्ध करून दिले आहे,” असे ते म्हणाले.
अंतिम वेळापत्रक संकेतस्थळावर
परीक्षांचे विषयनिहाय अंतिम वेळापत्रक लवकरच राज्य मंडळाच्या अधिकृत संकेतस्थळावर प्रसिद्ध केले जाणार आहे. विद्यार्थ्यांनी व पालकांनी अधिकृत वेबसाईटवर लक्ष ठेवण्याचे आवाहन करण्यात आले आहे.
विद्यार्थ्यांसाठी अंतिम तयारीचा काळ
फेब्रुवारी-मार्च 2026 मध्ये परीक्षा असल्याने विद्यार्थ्यांना आता तयारीसाठी सुमारे तीन महिने शिल्लक आहेत. वेळापत्रक लक्षात घेऊन नियोजनबद्ध अभ्यास करणाऱ्या विद्यार्थ्यांना या निर्णयाचा नक्कीच फायदा होणार आहे.
संकेतस्थळ: www.mahahsscboard.in
मुख्य परीक्षा:
बारावी: 10 फेब्रुवारी – 18 मार्च 2026
दहावी: 20 फेब्रुवारी – 18 मार्च 2026
प्रात्यक्षिक परीक्षा: जानेवारी–फेब्रुवारी 2026
