चीन आणि अमेरिकेमधील (China-US tension)व्यापारयुद्ध आता धोकादायक टप्प्यात पोहोचले आहे. दोन्ही देशांमधील (China-US) आर्थिक तणावाच्या पार्श्वभूमीवर चीनने लष्करी पातळीवर मोठे पाऊल उचलले आहे. तैवानच्या संरक्षण मंत्रालयानुसार, चीनने तब्बल 13 फायटर जेट्स आणि 6 युद्धनौका तैवानच्या सीमेजवळ तैनात केल्या आहेत, ज्यामुळे आशिया आणि जगभरात चिंता वाढली आहे.
तैवानच्या संरक्षण मंत्रालयाचा दावा
तैवानच्या संरक्षण मंत्रालयाने म्हटले आहे की, चीनची आठ लढाऊ विमाने तैवानच्या जलडमरूची मधली रेषा पार करून थेट तैवानच्या दक्षिण-पश्चिम आणि दक्षिण-पूर्व हवाई क्षेत्रात घुसली आहेत. मंत्रालयाने स्पष्ट केले की, “आमचं सैन्य या प्रत्येक हालचालीवर करडी नजर ठेवून आहे. परिस्थिती गंभीर बनल्यास आम्ही योग्य उत्तर देण्यासाठी पूर्णपणे सज्ज आहोत.”तैवानच्या अधिकृत ट्विटर हँडलवरही याबाबत एक पोस्ट करण्यात आली आहे, ज्यात चीनी विमानं आणि नौदलाची हालचाल स्पष्टपणे दर्शवण्यात आली आहे.
व्यापारयुद्धाची पार्श्वभूमी
दरम्यान, चीनने अलीकडेच अमेरिकेला मोठा आर्थिक धक्का दिला आहे ज्यात रेअर अर्थ मिनिरल्सची निर्यात थांबवली, ज्यावर अमेरिका मोठ्या प्रमाणात अवलंबून आहे.सोयाबीनची आयात बंद करण्याचा निर्णय घेतला, ज्यामुळे अमेरिकन कृषी क्षेत्रावर मोठा परिणाम झाला आहे.या दोन निर्णयांनंतर अमेरिकेचे माजी अध्यक्ष डोनाल्ड ट्रम्प यांनी चीनवर 100% टॅरिफ लागू करण्याची घोषणा केली, आणि त्यामुळे दोन्ही देशांमधील तणाव आणखीन वाढला आहे.
युद्धसदृश परिस्थिती?
आता चीनच्या ताज्या लष्करी हालचालींमुळे तैवानवरील आक्रमणाची शक्यता पुन्हा एकदा निर्माण झाली आहे. लष्करी तज्ज्ञांच्या मते, “चीन सातत्याने तैवानवर दबाव टाकत आहे, आणि ही तैनाती हे युद्धाचे प्रारंभिक संकेत असू शकतात.”
तैवानची ठाम भूमिका
तैवानने स्पष्ट केलं आहे की, “आम्ही शांतता प्रस्थापित ठेवण्याच्या बाजूने आहोत, पण आमच्या सार्वभौमत्वावर कुणी डोळा ठेवला, तर आम्ही प्रत्युत्तर देण्यासाठी मागेपुढे पाहणार नाही.”सध्या जगभरातील संरक्षण आणि परराष्ट्र मंत्रालये या घडामोडींवर बारीक नजर ठेवून आहेत.या तणावपूर्ण परिस्थितीमुळे आशिया पॅसिफिक प्रदेश पुन्हा एकदा युद्धाच्या उंबरठ्यावर असल्याची भीती व्यक्त केली जात आहे.
