पुणे: महाराष्ट्र राज्य माध्यमिक व उच्च माध्यमिक शिक्षण मंडळाने (MSBSHSE) दहावी ( SSC Exam Form 2025) परीक्षेसाठी अर्ज भरण्याची प्रक्रिया सुरू केली आहे. फेब्रुवारी-मार्च 2025 मध्ये होणाऱ्या परीक्षेसाठी, नियमित विद्यार्थ्यांचे अर्ज 15 सप्टेंबर, सोमवारपासून ऑनलाइन भरता येणार आहेत. मंडळाने दिलेल्या सूचनेनुसार, अर्ज भरण्याची अंतिम मुदत 6 ऑक्टोबर आहे. माध्यमिक शाळांनी युडायस (UDISE) प्रणालीचा वापर करून विद्यार्थ्यांचे अर्ज ऑनलाइन भरायचे आहेत.
या विद्यार्थ्यांचे अर्ज भरले जाणार:
नियमित विद्यार्थ्यांसोबतच इतर काही श्रेणीतील विद्यार्थीही अर्ज भरू शकतात. यामध्ये पुनर्परिक्षार्थी, श्रेणीसुधार योजनेतील विद्यार्थी आणि तुरळक विषय घेऊन परीक्षा देणाऱ्या विद्यार्थ्यांचा समावेश आहे. याशिवाय, ज्या खासगी विद्यार्थ्यांकडे नाव नोंदणी प्रमाणपत्र आहे आणि औद्योगिक प्रशिक्षण संस्थेद्वारे (ITI) ट्रान्सफर ऑफ क्रेडीट (Transfer of Credit) घेणाऱ्या विद्यार्थ्यांनाही अर्ज भरता येणार आहे.
शाळांसाठी महत्त्वाच्या सूचना:
शाळांनी विद्यार्थ्यांचे अर्ज भरण्यापूर्वी ‘स्कूल प्रोफाइल’मध्ये आवश्यक माहिती भरणे अनिवार्य आहे. यात शाळा, संस्था, मान्यताप्राप्त विषय आणि शिक्षकांची माहिती समाविष्ट आहे. ही माहिती भरल्यानंतर मंडळाकडे पाठवणे आवश्यक आहे. सर्व विद्यार्थ्यांनी आपले अर्ज शाळेमार्फतच ऑनलाइन भरावेत, असे आवाहन शिक्षण मंडळाने केले आहे.
