राजेंद्र गुंड-पाटील
माढा : श्री संत गाडगेबाबा माध्यमिक विद्यालय हे विविध परीक्षेतील शैक्षणिक गुणवत्तेबरोबरच विद्यार्थ्यांच्या अंगी असलेल्या सुप्त कलागुणांना वाव देण्यासाठी शालेय व सहशालेय उपक्रम राबविण्यात तालुक्यात अग्रेसर असल्याचे गौरवोद्गार मानेगाव केंद्राचे केंद्रप्रमुख रोहिदास कापसे यांनी काढले.
श्री विठ्ठल ज्ञानपीठ निमगाव (टें) संचलित कापसेवाडी – हटकरवाडी (ता. माढा) येथील संत गाडगेबाबा माध्यमिक विद्यालयातील महात्मा गांधी राजभाषा हिंदी प्रचार संस्था पुणे यांच्या वतीने घेण्यात आलेल्या स्पर्धा परीक्षेत उत्तीर्ण झालेल्या गुणवंत विद्यार्थ्यांना केंद्रप्रमुख रोहिदास कापसे यांच्या हस्ते गोल्डमेडल व प्रमाणपत्र देऊन गौरविण्यात आले. यावेळी रोहिदास कापसे बोलत होते.
हिंदी राष्ट्रभाषेचा प्रचार व प्रसार व्हावा या उद्देशाने घेण्यात आलेल्या राज्यस्तरीय स्पर्धा परीक्षेत संत गाडगेबाबा माध्यमिक विद्यालयाचे एकूण ९१ विद्यार्थी बसले होते. त्यापैकी ८० विद्यार्थी प्रथम श्रेणीत व ११ द्वितीय श्रेणीत उत्तीर्ण झाले तर लहान गटात प्रथम क्रमांक मोरेश्वर बगडे याने व मोठ्या गटात प्रथम क्रमांक प्रांजली पवार हिने पटकावला आहे.
या दोघांनाही राष्ट्रीय राजभाषा हिंदी गौरवरत्न पुरस्कार मिळाला असून त्यांना गोल्डमेडल व प्रमाणपत्र देऊन गौरविण्यात आले. तसेच गुणवंत विद्यार्थ्यांना राष्ट्रीय राजभाषारत्न पुरस्कार मिळाल्याबद्दल मेडल व प्रमाणपत्र देण्यात आले. यावेळी हा उपक्रम राबविणारे सहशिक्षक सुनील खोत व मुख्याध्यापक प्रवीण लटके यांना प्रमाणपत्र देऊन गौरविण्यात आले.
यावेळी मुख्याध्यापक प्रवीण लटके, तुकाराम कापसे, शिवाजी भोगे, तनुजा तांबोळी, सचीन क्षीरसागर, सुधीर टोणगे, लहू गवळी, सागर राजगुरू यांच्यासह प्रशालेतील पाचवी ते दहावीचे विद्यार्थी उपस्थित होते.
दरम्यान, सर्व यशस्वी विद्यार्थ्यांचे अभिनंदन आमदार बबन दादा शिंदे, आमदार संजय मामा शिंदे, चेअरमन रणजितसिंह शिंदे, सभापती विक्रमसिंह शिंदे, सचिव प्रणिता शिंदे, पंचायत समिती सदस्य धनराज शिंदे, गटशिक्षणाधिकारी बंडू शिंदे यांच्यासह शिक्षक व शिक्षकेतर कर्मचारी व पालकांनी केले आहे. तर प्रास्ताविक सहशिक्षक सुनील खोत यांनी केले.
