मुंबई : सध्या डिजिटल पेमेंटच्या संख्येत वाढ होताना दिसत आहे. या वाढत्या ट्रेंडमध्ये, काहीवेळा तुम्हाला अजूनही रोख रकमेची आवश्यकता असते. तेव्हा तुम्ही ही रोकड बँकेच्या एटीएममधून काढता. पण आता एटीएममधून मोफत पैसे काढण्याची मासिक मर्यादा संपल्यानंतर बँक ग्राहकाला एक मे पासून प्रत्येक व्यवहारासाठी 23 रुपये मोजावे लागणार आहेत.

रिझर्व्ह बँक ऑफ इंडिया (RBI) ने बँकांना एटीएममधून पैसे काढण्यासाठी शुल्क 2 रुपयांनी वाढवून प्रति व्यवहार 23 रुपये करण्यास मान्यता दिली आहे. दर महिन्याला मोफत पैसे काढण्याची मर्यादा संपल्यानंतर एटीएममधून पैसे काढल्यावर हे शुल्क आकारले जाईल. ग्राहक त्यांच्या बँकेच्या एटीएममधून दर महिन्याला पाच मोफत व्यवहार करण्यास पात्र आहेत. ग्राहक इतर बँकांच्या एटीएममधून एका विशिष्ट मर्यादेपर्यंत मोफत व्यवहारांसाठी देखील पात्र आहे. ते महानगरांमध्ये तीन विनामूल्य व्यवहार करू शकतात आणि इतर ठिकाणी पाच विनामूल्य व्यवहार करू शकतात.
या रकमेपेक्षा जास्त व्यवहारांसाठी बँकेकडून शुल्क आकारले जाते. आरबीआयने एक अधिसूचना जारी करून म्हटले आहे की, ‘मोफत व्यवहारांव्यतिरिक्त, ग्राहकाकडून प्रति व्यवहार जास्तीत जास्त 23 रुपये शुल्क आकारले जाऊ शकते. हा बदल 1 मे 2025 पासून लागू केला जाणार आहे.








