मुंबई : शेअर बाजारात आज मोठी घसरण झाली. निर्देशांक सेन्सेक्स आज 1,628 अंकांनी घसरला. तर राष्ट्रीय शेअर बाजाराचा निर्देशांक असलेला निफ्टी 460 अंकांनी घसरला. गेल्या 16 महिन्यामधील ही सर्वात मोठी घसरण आहे. त्यामुळे गुंतवणूकदारांना 4.5 लाख कोटींचे नुकसान सहन करावे लागले आहे.
बँकिंग आणि वित्तीय समभागांच्या विक्रमी घसरणीने शेअर बाजाराचे कंबरडे मोडले. आज बाजारातील घसरणीचे सर्वात मोठे कारण म्हणजे एचडीएफसी बँकेतील मोठी घसरण. सेन्सेक्सच्या 1600 अंकांच्या घसरणीत एकट्या एचडीएफसी बँकेच्या 950 अंकांची म्हणजे साडे आठ टक्क्यंची घसरण झाली.
यापूर्वी देशांतर्गत बाजारात जून 2022 मध्ये अशी घसरण दिसून आली होती. बुधवारी सकाळपासून BSE सेन्सेक्स आणि NSE निफ्टी दोन्ही मोठ्या घसरणीचे संकेत देत होते. दोघांची सुरुवात प्रत्येकी एक टक्का घसरणीने झाली. दिवसाचा व्यवहार जसजसा वाढत गेला तसतसा बाजारातील तोटा वाढत गेला. व्यवहाराच्या समाप्तीपर्यंत, सेन्सेक्स आणि निफ्टीचा तोटा 2.25 टक्क्यांवर पोहोचला होता, जो देशांतर्गत शेअर बाजारातील एका दिवसातील सर्वात मोठी घसरण आहे.
सेन्सेक्सचे एवढे मोठे नुकसान
एका दिवसापूर्वी सेन्सेक्स 73,128.77 अंकांवर होता. आज त्याने 71,998.93 अंकांवर मोठ्या तोट्यासह सुरुवात केली. व्यवहार संपल्यानंतर सेन्सेक्स 1628.01 अंकांनी म्हणजेच 2.23 टक्क्यांनी घसरला आणि 71,500.76 अंकांवर बंद झाला.
आयटी समभाग वगळता सर्व शेअर्समध्ये घसरण
सेन्सेक्स कंपन्यांमध्ये, केवळ टेक स्टॉक्सने बाजाराला काही प्रमाणात आधार दिला. एचसीएल टेक सर्वाधिक 1.34 टक्क्यांनी मजबूत झाला. इन्फोसिस 0.55 टक्के, टेक महिंद्रा 0.54 टक्के आणि टीसीएस 0.38 टक्के वधारले तर दुसरीकडे एचडीएफसी बँक सर्वाधिक साडेआठ टक्क्यांनी घसरली. टाटा स्टील 4 टक्क्यांहून अधिक घसरले. कोटक बँक, अॅक्सिस बँक, आयसीएआय बँक, जेएसडब्ल्यू स्टील आणि बजाज फिनसर्व्हचे समभाग 2.38 टक्क्यांनी 3.66 टक्क्यांनी घसरले.
