Gold Silver Price Today: सोन्या आणि चांदीच्या दरात सलग दुसऱ्या दिवशीही मोठी घसरण नोंदवण्यात आली आहे. शुक्रवारी सकाळी व्यवहार सुरू होताच मल्टी कमॉडिटी एक्स्चेंज ऑफ इंडिया (MCX) वर चांदीच्या किमतीत तब्बल 15 हजार रुपये प्रति किलोची घसरण झाली. त्यामुळे चांदीचा दर घसरून 2,29,872 रुपये प्रति किलोवर आला आहे.
सोन्याच्याही दरात घट झाली असून MCX वर सोन्याच्या किमतीत जवळपास 0.8 टक्क्यांची घसरण झाली आहे. 10 ग्रॅम सोनं सध्या सुमारे 1,50,675 रुपयांवर पोहचले आहे. काही दिवसांपूर्वीच सोनं आणि चांदीने विक्रमी उच्चांक गाठला होता. मात्र त्या उच्च पातळीवरून आता दोन्ही मौल्यवान धातूंमध्ये मोठी पडझड झाल्याचे दिसून येत आहे.
एप्रिल 2026 एक्सपायरीचा गोल्ड फ्युचर्स करार आपल्या विक्रमी स्तरापेक्षा सुमारे 28 हजार रुपयांनी आधीच खाली आला आहे. त्याचप्रमाणे चांदीही आपल्या ‘ऑल टाइम हाय’च्या तुलनेत दीड लाख रुपयांहून अधिक स्वस्त झाली आहे.
भाव घसरण्यामागची कारणे
बाजारतज्ज्ञांच्या मते, अमेरिका आणि इराण यांच्यातील तणाव कमी होण्याची चिन्हे दिसू लागल्याने सोन्या-चांदीच्या किमती कमी झाल्या आहेत. दोन्ही देशांमध्ये अणुकरारासंदर्भात पुन्हा चर्चा सुरू झाल्यामुळे जागतिक बाजारातील अनिश्चिततेचे वातावरण काहीसे कमी झाले आहे. परिणामी, गुंतवणूकदार सुरक्षित गुंतवणूक मानल्या जाणाऱ्या सोन्या-चांदीऐवजी डॉलरकडे वळताना दिसत आहेत.
डॉलर मजबूत झाल्यास सामान्यतः सोन्या-चांदीच्या किमतींवर दबाव येतो आणि सध्या हीच स्थिती बाजारात पाहायला मिळत आहे. मागील काही आठवड्यांत मौल्यवान धातूंमध्ये मोठी तेजी होती. आता ही तेजी ओसरत असून दर हळूहळू खाली येत असल्याचे तज्ज्ञांचे म्हणणे आहे. काही बाजारतज्ज्ञांनी आगामी काळात किमतींमध्ये आणखी घसरण होण्याची शक्यता व्यक्त केली आहे.
एकंदरीत, सध्या सोन्या-चांदीच्या बाजारात मोठी अस्थिरता कायम आहे. उच्च दरात खरेदी केलेले गुंतवणूकदार संधी मिळताच नफा वसुलीकडे वळू शकतात. आगामी काही दिवसांत जागतिक घडामोडी आणि डॉलरमधील गुंतवणूक यावरच सोन्या-चांदीच्या किमतींची पुढील दिशा अवलंबून राहणार आहे.
