Pune News : जुन्नर, (पुणे) : जुन्नर-ओतूर मार्गावर पांगरीमाथा येथे शनिवारी दुपारी झालेल्या हायवा ट्रक आणि कारच्या भीषण अपघातात जुन्नरचे नायब तहसीलदार अनंता बनाजी गवारी (वय 52) यांचा दुर्दैवी मृत्यू झाला. या अपघातात कारमधील अन्य दोन जण गंभीर जखमी झाले असून त्यांच्यावर उपचार सुरू आहेत. एका वरिष्ठ महसूल अधिकाऱ्याचा अशा अपघाती निधनामुळे संपूर्ण जुन्नर तालुक्यावर शोककळा पसरली आहे. Pune News
मिळालेल्या माहितीनुसार, शनिवारी दुपारी अडीच वाजण्याच्या सुमारास हा अपघात झाला. जुन्नर येथून एक हायवा ट्रक ओतूरच्या दिशेने जात होता, तर नायब तहसीलदार गवारी यांची कार विरुद्ध दिशेने येत होती. पांगरीमाथा येथील वळणावर दोन्ही वाहनांची समोरासमोर भीषण धडक झाली. धडक इतकी जोरदार होती की कारच्या समोरील भागाचा अक्षरशः चक्काचूर झाला. Pune News
अपघातानंतर स्थानिक नागरिकांनी तातडीने धाव घेत कारमध्ये अडकलेल्या जखमींना बाहेर काढले. यामध्ये अनंता गवारी यांच्यासह विजय खारतोडे (वय 48) आणि तुषार कोरडे (वय -35) हे गंभीर जखमी झाले होते. त्यांना सुरुवातीला ओतूर येथील खासगी रुग्णालयात नेण्यात आले. गवारी आणि खारतोडे यांची प्रकृती चिंताजनक असल्याने त्यांना तातडीने पुण्यातील रुग्णालयात हलवण्यात आले. मात्र, दुर्दैवाने उपचार सुरू असताना अनंता गवारी यांची प्राणज्योत मालवली. Pune News
घटनेची माहिती मिळताच ओतूर पोलीस ठाण्याचे सहाय्यक पोलीस निरीक्षक ज्ञानेश्वर बाजगिरे, हवालदार नामदेव बांबळे आणि पथकाने घटनास्थळी धाव घेतली. अपघातामुळे जुन्नर-ओतूर मार्गावरील वाहतूक काही काळ विस्कळीत झाली होती. पोलिसांनी अपघातग्रस्त वाहने बाजूला करून वाहतूक सुरळीत केली. Pune News
दरम्यान, अनंता गवारी हे महसूल विभागात अत्यंत संयमी आणि कामाप्रती निष्ठा असलेले अधिकारी म्हणून ओळखले जात होते. त्यांच्या निधनाने महसूल विभागात मोठी पोकळी निर्माण झाली आहे. ओतूर पोलीस या अपघाताचा पुढील तपास करत आहेत. Pune News
