राहुलकुमार अवचट
दौंड : यवत (ता. दौंड ) गावाजवळ असणाऱ्या भुलेश्वर रोडवर हातात तलवार घेऊन आरोग्यसेवकाला शिवीगाळ दमदाटी केल्याची घटना उघडकीस आली असून याप्रकरणी एकावर यवत पोलीस ठाण्यात गुन्हा दाखल करण्यात आला आहे.
दत्तात्रय गायकवाड असे गुन्हा दाखल करण्यात आलेल्या आरोपीचे नाव आहे. तर याप्रकरणी योगेश घाटे (आरोग्यसेवक रा. यवत ता. दौंड) असे फिर्याद दिलेल्या आरोग्य सेवकाचे नाव आहे.
मिळालेल्या माहितीनुसार, फिर्यादी त्यांच्या भावाला घरी सोडवायला जात असताना भुलेश्वर रोडवर असणाऱ्या सुहाना कंपनीच्या गोडाउन गेटच्या समोर गाडी आल्यानंतर आरोपी दत्तात्रय गायकवाड याने त्यांना गाडी बाजूला घ्यायला लावली. त्यानंतर फिर्यादीला घेवून जावुन आरोपीने झुडुपात लपवुन ठेवलेली धारदार तलवार बाहेर काढली.
त्यानंतर घाटे यांना शिविगाळ करत तुम्हाला सगळ्यांना लय माज आलाय काय, तुम्हाला सगळ्यांना बघतोच असे म्हणुन दमदाटी करून दहशत केली. विशेष म्हणजे घाटे आणि गायकवाड हे दोघे आते भाऊ असून गायकवाड याने नेमक्या कोणत्या कारणासाठी त्यांना शिवीगाळ व दमदाटी केली याचे कारण अजूनही समजू शकलेले नाही.
याप्रकरणी घाटे यांनी यवत पोलीस ठाण्यात फिर्याद असून त्यानुसार आरोपी गायकवाड याच्याविरोधात गुन्हा दाखल करण्यात आला आहे. या घटनेचा पुढील तपास पोलीस करत आहेत.
