राहुलकुमार अवचट
यवत, (पुणे) : चोर असल्याच्या संशयावरुन एका व्यक्तीचा डोक्यात दगड मारून खून केल्याची धक्कादायक घटना बोरीपार्धी येथे घडली. गुरूवारी (दि.१९) रात्री साडेअकराच्या सुमारास घडलेल्या या घटनेने परिसरात एकच खळबळ उडाली. याप्रकरणी यवत पोलिसांनी दोघांविरोधात गुन्हा दाखल केला आहे.
राम राजेंद्र माने (रा. दापोडी) व पंजू रामदास धनगर (रा. सोनवडी ता. दौंड) या दोघांवर यवत पोलिसांत गुन्हा दाखल करण्यात आला आहे. बोरीपार्धी येथे गुरुवारी रात्रीच्या सुमारास श्री स्वामी समर्थ पार्किंगच्या बाजूला राम व पंजू यांनी एका ६० ते ६५ वर्षांच्या अनोळखी व्यक्तीला चोर असल्याच्या संशयावरून दगडाने डोक्यात मारहाण केली. तसेच त्यांनी संशयिताला हातानेही मारहाण केली. यामध्ये संशयित व्यक्तीला जबर दुखापत झाली. यामध्ये त्याचा मृत्यू झाला.
याबाबत राजेंद्र बापुराव अडागळे यांनी राम व पंजु या दोघांच्या विरोधात यवत पोलीस स्टेशन येथे फिर्याद दिली. या फिर्यादीवरून दोघांविरोधात गुन्हा दाखल करण्यात आला. यातील पंजु रामदास धनगर याच्या विरोधात वडगांव निंबाळकर ,जेजुरी पोलीस स्टेशन येथे विविध स्वरूपाचे गुन्हे दाखल आहेत.
दरम्यान, याप्रकरणाचा पुढील तपास यवत पोलीस स्टेशनचे पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस निरीक्षक संदेश बावकर हे करत आहेत.
