पुणे : गाडी मनमाड स्टेशन येथे जास्त वेळ थांबली. आणि बोगीमध्ये एका पॅसेंजरशी वाद झाला होता. याचा राग मनात धरून पुणे रेल्वे स्टेशन उडवून देण्याची धमकी देणाऱ्या आरोपीला पोलिसांनी ताब्यात घेतले आहे.
गोविंद भगवान मांडे (वय- ३८, रा. मूळ परभणी, सध्या कात्रज ) अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, शुक्रवारी (ता. १३) संध्याकाळी आठ वाजण्याच्या सुमारास एका इसमाने कॉल करून मळवली ते काने स्टेशन दरम्यान बॉम्बस्फोट घडून येईल ही माहिती दिली होती. तसेच पुणे रेल्वे स्टेशनमध्ये दहशत हल्ला करण्यात येईल अशी माहिती मिळाली होती. माहिती मिळताच, लोहमार्ग पोलीस जीआरपीएफ व स्थानिक पोलीस व श्वान पथकाच्या मदतीने पुणे रेल्वे स्टेशन येथे कॉम्बिंग ऑपरेशन सुरू करण्यात आली होती.
पुणे रेल्वे स्टेशनवर डॉग स्कॉड, बॉम्ब शोध पथक, पोलीस यांचा चोख बंदोबस्त ठेवण्यात आला, पोलीस आसपास होणाऱ्या सर्व घडामोडींवर लक्ष ठेऊन होते. रेल्वे स्थानकावर सुरक्षा वाढवण्यात आली होती. प्रवाश्यांनाही सतर्क राहण्याचे आवाहन करण्यात आले होते. त्यानुसार रेल्वे पोलिसांनी हा फोन करणाऱ्या व्यक्तीला अटक केली आहे.
त्याच्याकडे अधिक चौकशी केली असता त्याने त्याचे नाव गोविंद मांडे असल्याचे सांगितले. तसेच मूळचा परभणीचा असून मागील १ महिन्यापासून कात्रज येथे वॉचमनची नोकरी करत होता. तर त्याने गाडी मनमाड स्टेशन येथे जास्त वेळ थांबली. आणि बोगीमध्ये एका पॅसेंजरशी वाद झाला होता. त्यामुळे तो राग मनात धरून होक्सकॉल केला असल्याची माहिती पोलिसांना दिली आहे.
दरम्यान, हा धमकीचा फोन कुणी केला? कुठून आला? याचा तपास सुरू होता. पोलीस त्याचा शोध घेत होते. मात्र, पोलिसांनी वर्दळीच्या या रेल्वे स्थानकाची सुरक्षा अधिक वाढवली असून प्रत्येकाच्या हालचालीकडे लक्ष ठेवलं जात होतं. तसेच रेल्वे प्रशासनही अलर्ट मोडवर आलं होतं.
