पुणे : वैष्णवी हगवणे प्रकरणात धक्कादायक खुलासे समोर येत आहेत.वैष्णवी हिच्या चारित्र्यावर हगवणे कुटुंबियांचे वकील विपूल दुशिंग चुकीचे दावे करत आहेत. आता यावरून महिला आयोग ॲक्शन मोडवर आला असून राज्य महिला आयोगाने वकील विपूल दुशिंग यांच्याविरोधात बार कौन्सिलला पत्र दिले आहे. वैष्णवी हगवणे केसमधील आरोपींच्या वकिलांचे वर्तन ॲडव्होकेट्स कायदा १९६१ मधील तरतुदींचे उल्लंघन करणारे आहे,असे त्यांनी म्हटले आहे.
राज्य महिला आयोगाने सचिव, बार कौन्सिल यांना पत्र लिहून याबाबत गांभीर्याने विचार व्हावा आणि अधिवक्तांसाठी सुस्पष्ट नियमावली ठरवावी अशा सूचना केल्या आहेत. पत्रामध्ये म्हटले की, पुण्यातील वैष्णवी हगवणे हिचा सासरकडून हुंड्यासाठी होणारा छळ आणि मृत्यू या अतिशय संवेदनशील विषयाबाबत न्यायालयीन प्रक्रिया सुरू आहे, असे असताना आरोपींच्या अधिवक्त्यांकडून माध्यमांत मयत वैष्णवीच्या वैयक्तिक आयुष्याबाबत आरोप केले जात आहेत.अशा संवेदनशील प्रकरणांमध्ये वकिलांनी माध्यमात बोलताना भान बाळगणे गरजेचे आहे, असे आयोगाने म्हटले आहे.
दरम्यान आपल्या वक्तव्यामुळे पीडितेची प्रतिमा मलीन होत आहे. यामुळे तिच्या कुटुंबियांना मानसिक, भावनिक त्रासाला सामोरे जावे लागत आहे. समाज म्हणून वैष्णवी हगवणे हिला आणि तिच्या कुटुंबियांना न्याय मिळण्यासाठी आपण त्यांच्या पाठीशी उभे राहणे गरजेचे आहे. न्याय मिळण्याच्या प्रक्रियेदरम्यान माध्यमातून होणारे असे चारित्र्यहनन पूर्णपणे चुकीचे असून मनोवल खच्ची करणारे आहे, असेही पत्रात म्हटले आहे.
