गणेश सूळ
केडगाव : घरात कोणालाही काही न सांगता चार वर्षांच्या मुलासह महिला बेपत्ता झाल्याची घटना केडगाव (ता. दौंड) स्टेशन परिसरातून रविवारी (दि.२७) संध्याकाळी साडेसात वाजण्याच्या सुमारास उघडकीस आली आहे.
रुपाली कृष्णा जाधव (वय २४) व मुलगा श्लोक कृष्णा जाधव (वय ४, दोघे रा. केडगाव ता. दौड जि. पुणे) अशी बेपत्ता झालेल्या मायलेकरांची नावे आहेत. याप्रकरणी रुपालीचे पती कृष्णा सोपान जाधव (वय २६, रा. केडगाव स्टेशन ता. दौंड जि. पुणे) यांनी यवत पोलीस ठाण्यात तक्रार दिली आहे.
पोलिसांनी दिलेल्या माहितीनुसार, कृष्णा जाधव हे केडगाव परिसरात चालक म्हणून काम करतात. जाधव हे रविवारी (ता.२७) सकाळी नेहमीप्रमाणे कामाला गेले होते. दरम्यान, जाधव संध्याकाळी साडेसात वाजण्याच्या सुमारास घरी आले असता, त्यांना पत्नी रुपाली व मुलगा श्लोक घरात आढळून आला नाही. जाधव यांनी शेजाऱ्यांकडे विचारपूस केली असता, त्याच्याबाबत काहीच माहिती मिळाली नाही. त्यानंतर जाधव यांनी नातेवाईकांकडे शोध घेतला असता, दोघेही कोठे मिळून आले नाहीत. त्यामुळे जाधव यांनी दोघेही बेपत्ता झाल्याची तक्रार यवत पोलीस ठाण्यात दिली.
पाच दिवसांपासून बेपत्ता
रुपाली व श्लोक हे मायलेक ५ दिवसांपासून बेपत्ता झाले आहेत. ते कोणाला आढळून आल्यास त्यांनी तातडीने यवत पोलिसांशी संपर्क करावा, असे आवाहन यवत पोलिसांनी केले आहे.
