Wakad Crime | पिंपरी-चिंचवड : उसने पैसे वेळेवर दिले नाहित म्हणून तरुणाचे अपहरण करून त्याला मारहाण केल्याचा प्रकार समोर आला आहे. हा प्रकार शुक्रवारी (दि.6) वाकड येथे मुंबई- बँगलोर महामार्गावर घडला. मारहाणीनंतर तरुणाला रुममध्ये कोंडून ठेवण्यात आल्याचा धक्कादायक प्रकार उघडकीस आला आहे. याप्रकरणी वाकड पोलीसांनी दोघांना ताब्यात घेतले आहे.
याप्रकरणी जावेद आरिफ खान (वय 26 रा. भोसरी) यांनी वाकड पोलिसांनी फिर्याद दिली असून पोलिसांनी रफिक मेहबुब शेख (वय 28 रा.देहुरोड) व आमान आमिन शेख (वय 21 रा.देहुरोड) यांना अटक केली आहे तर दोन अनोळखी इसावर गुन्हा दाखल केला आहे.
मिळालेल्या माहितीनुसार, फिर्यादी यांनी आमान याच्याकडून 1 लाख रुपये उसने घेतले. ते वेळेवर परत केले नाहीत म्हणून आरोपीने फिर्यादीचे जबरदस्तीने अपहरण केले व मारहाण केली. पैसे मिळविण्यासाठी आमान आणि रफिकभाईने इतर दोन मित्रांच्या मदतीने तरुणाला स्विफ्ट कारमध्ये जबरदस्तीने बसवले.त्यानंतर तरुणाला देहूरोड येथील नदीच्या किनारी नेऊन हाताने व रॉडने बेदम मारहाण केली.
मारहाण केल्यानंतर तरुणाला कारमधून लिंक रोड येथील रमाबाईनगरमध्ये असलेल्या एका फ्लॅटमध्ये आणले. आमानने तरुणाच्या भावाला आणि वडीलांना फोन लावून पैशांची मागणी केली. पैसे मिळत नाहीत तो पर्यंत तरुणाला फ्लॅटमधील एका रूममध्ये कोंडुन ठेवण्यात आले होते. पुढील तपास पोलीस करत आहेत.
