संतोष गायकवाड
वाघोली, (पुणे) : वाघोली परिसरातून रिक्षा चोरणाऱ्या एका अल्पवयीन मुलाला गुन्हे शाखा युनिट सहाच्या पोलिसांनी ताब्यात घेतले आहे.
पोलिसांनी दिलेल्या माहितीनुसार, मंगळवारी (ता. २२) युनिट ६ चे पोलीस अधिकारी व अंमलदार हे वाघोली गावचे हद्दीत गस्त घालीत असताना एका खबऱ्याकडून पोलीस अंमलदार ऋषिकेश व्यवहारे यांना माहिती मिळाली कि, अल्पवयीन मुलाकडे चोरीची रिक्षा असून तो रोहन अभिलाशा सोसायटीजवळ, भावडी रोड, वाघोली, पुणे येथे सार्वजनिक रोडवर रिक्षासह थांबलेला आहे.
मिळालेली माहिती वरिष्ठांना कळवून त्यांनी दिलेल्या आदेशानुसार माहिती मिळालेल्या ठिकाणी कारवाई करण्याचे आदेश दिले. त्यानुसार सदर अल्पवयीन मुलास सापळा रचून ताब्यात घेतले. त्याच्याजवळ असलेली ४० हजार रुपये किमतीची रिक्षा जप्त केली आहे. त्याची वैद्यकीय तपासणी करुन लोणीकंद पोलीस ठाण्यात गुन्हा नोंद करण्यात आला आहे.
दरम्यान, सदरची कामगिरी वरीष्ठ पोलीस निरीक्षक रजनीश निर्मल, पोलीस उप निरिक्षक सुरेश जायभाय, पोलीस अंमलदार ऋषीकेश व्यवहारे, सचिन पवार यांच्या पथकाने केलेली आहे.
