पुणे : जबरदस्तीने पैसे काढून घेणाऱ्या दोघांना प्रतिकार केल्याने दोघांनी एका तरुणाला बेदम मारहाण करून त्याचा खून केल्याची घटना पुणे-सातारा रोडवरील गुडलक मोटर्स, हेमी प्लाझा येथे शुक्रवारी (ता.२४) मध्यरात्री तीन वाजता घडली. याप्रकरणी भारती विद्यापीठ पोलिसांनी एका सराईत गुन्हेगारास त्याच्या अल्पवयीन साथीदाराला ताब्यात घेतले.
महादेव नागनाथ चेंडके (वय २२, रा. खोपडेनगर, कात्रज) असे खून झालेल्या तरुणाचे नाव आहे. सराईत गुन्हेगार प्रदीप हिरालाल शिंदे (वय १९ रा. कात्रज, मूळ गाव आष्टी, श्रीगोंदा) याला अटक केली आहे. तर त्याच्या अल्पवयीन साथीदाराला ताब्यात घेतले आहे.
पोलिसांनी दिलेल्या माहितीनुसार, अज्ञात व्यक्ती रस्त्यावर मृतावस्थेत पडल्याची माहिती पोलिसांना मिळाली. पोलिसांनी तत्काळ घटनास्थळाचा पंचनामा करून मृतदेह शवविच्छेदनासाठी पाठवून दिला. शवविच्छेदन अहवालात मारहाण झाल्याने मृत्यू झाल्याचे समोर आले. त्यानुसार पोलिसांनी परिसरातील सीसीटीव्ही तपासले, त्यावेळी आरोपींची माहिती मिळाली. आरोपी हा सराईत गुन्हेगार असून त्याच्यावर यापूर्वी दोन गुन्हे दाखल करण्यात आल्याची माहिती मिळाली.
त्यानंतर शिंदे हा श्रीगोंदा येथे राहत असून तो त्याच्या अल्पवयीन साथीदाराला भेटण्यासाठी पुण्यात आला असता पोलिसांनी मोठ्या शिताफीने त्याला ताब्यात घेतले. शुक्रवारी मध्यरात्री त्यांनी पैशांसाठी महादेव याला अडवले. त्याच्याकडून जबरदस्तीने पैसे काढून घेत असताना महादेवने प्रतिकार करताच आरोपींनी त्याला मारहाण करून त्याचा खून केल्याची कबुली दिली. या घटनेचा पुढील तपास पोलीस करीत आहेत.
