लोणी काळभोर : धावत्या कारने अचानक पेट घेतला. या अचानक घडलेल्या प्रकाराने वाहनचालकांसह नागरिकांची चांगलीच तारांबळ उडाली. सोलापूर महामार्गावर कदमवाकवस्ती ग्रामपंचायत हद्दीमध्ये शुक्रवारी (दि.१) रात्री पावणेनऊच्या सुमारास ही घटना घडली.
प्रत्यक्षदर्शी असलेल्या रिक्षाचलक दत्ता गायकवाड यांनी या घटनेची संपूर्ण माहिती दिली. ते म्हणाले की, ‘कदमवाकवस्ती येथे अचानक कारने पेट घेतला. कारचालकाने प्रसंगावधान दाखवून कार थांबून सहप्रवाशासह खाली उतरले. स्थानिक नागरिकांनी वाळू, माती आणि पाण्याचा मारा करून पेटती कार आटोक्यात आणली. दरम्यान, कार पेटल्याचे वृत्त वाऱ्यासारखे पसरले आणि रस्त्याच्या दुतर्फा बघ्याची तोबा गर्दी झाली होती. त्यामुळे सोलापूर महामार्गावर सुमारे दोन किमीपर्यंत वाहनांच्या रांगा लागल्या होत्या.
नियंत्रण कक्षाला फोनवरून माहिती दिल्यानंतर लोणी काळभोर पोलीस स्टेशन आणि वाहतूक पोलीस अधिकारी-कर्मचाऱ्यांनी घटनास्थळी धाव घेत वाहतूक सुरळीत केली. कारचालकाच्या प्रसंगावधानामुळे मोठा अनर्थ टळल्याचे स्थानिक नागरिकांनी सांगितले.
