लोणावळा : लोहगड (ता. मावळ) किल्ल्याच्या पायथ्याला फिरण्यासाठी आलेल्या ७२ विद्यार्थ्यांची बस ४० फुट दरीत कोसळल्याची धक्कादायक घटना नुकतीच उघडकीस आली आहे. या अपघातात ३ जण गंभीर जखमी तर अनेक किरकोळ जखमी असल्याची माहिती मिळत आहे. जखमींना लोणावळा व सोमाटणे येथील रुग्णालयात उपचारासाठी दाखल करण्यात आले आहे.
मिळालेल्या माहितीनुसार, एका खासगी क्लासचे ७२ विद्यार्थी लोहगड (ता. मावळ) किल्ला पाहण्यासाठी चालले होते. त्यांच्यासोबत चार शिक्षक आणि इतर कर्मचारी होते. बस लोहगड किल्ल्याच्या रस्त्यावरून जात असताना वाहनचालकाचे वाहनावरील नियंत्रण सुटले आणि बस लोहगड किल्ल्याजवळ असलेल्या दुधिवरे खिंडीत ४० फुट खोल दरीत कोसळली.
दरम्यान, या अपघाताची माहिती मिळताच लोणावळा ग्रामीण पोलीस ठाण्यातील अधिकारी व कर्मचारी तसेच शिवदुर्ग मित्र मंडळाच्या पदाधिकाऱ्यांनी घटनास्थळी धाव घेतली.
त्यानंतर अपघातात जखमी झालेल्यांना बाहेर काढण्यात आले. अचानक झालेल्या अपघातामुळे विद्यार्थी घाबरले होते. याप्रकरणी लोणावळा ग्रामीण पोलीस वाहनचालकाविरुद्ध कायदेशीर कारवाई करत आहेत.
