अंबाजोगाई : अंबाजोगाई-लातूर महामार्गावर कारचा भीषण अपघात झाला असून यात ३ जणांचा मृत्यू झाला आहे. तर दुसरा अपघात पोखरी फाटा येथे झाला असून यात ५ जण जखमी झाले आहे. बीड जिल्ह्यातील अंबाजोगाई लातूर महामार्गावरील अपघातांची मालिका सातत्याने सुरु आहे.
बर्दापूरजवळ रस्त्याच्या कडेला उभा असलेल्या उसाच्या ट्रॅक्टरवर भरधाव कार आदळली. हा अपघात इतका भीषण होता की, यामध्ये कारचा चुराडा झाला. या अपघातात 3 जणांचा मृत्यू झाला आहे. अपघातात मृत पावलेले तिघेही रेणापूर येथील रहिवासी आहेत.
बबन प्रभू राठोड (वय 45, बिटरगाव, ता. रेणापूर), नंदू माणिक राठोड (वय 33, बिटरगाव, ता. रेणापूर), राहुल सुधाकर मुंडे (वय 31, वंजारवाडी, ता. रेणापूर) अशी तिघा मयतांची नाव आहे. हे दोन्ही अपघात एकाच रस्त्यावर एक तासाच्या अंतराने झाले असून ऊसाच्या ट्रॅक्टरला रिफलेक्टर नसल्याने हा अपघात झाल्याचा संशय व्यक्त केला जात आहे.
दुसरा अपघात महामार्गावरिल पोखरी फाटा येथे टेम्पो, कार आणि ऊसाच्या ट्रॅक्टरचा अपघात झाला. या अपघातात पाच जण जखमी झाले त्यांच्यावर अंबाजोगाईच्या स्वामी रामानंद तीर्थ ग्रामीण शासकीय रुग्णालयात उपचारासाठी दाखल करण्यात आले आहे.
