पुणे : शेजाऱ्याच्या घरात घुसून फोन पे वरुन जबरदस्तीने स्वत:च्या खात्यात पैसे ट्रान्सफर करुन, बळजबरीने कार चोरुन नेल्याची घटना उघडकीस आली आहे. ही घटना वडगाव शेरी साईनाथनगर येथे रविवारी (ता.२९) पहाटे ४ वाजता घडली आहे.
रोहन रवींद्र गायकवाड (वय २४, रा. साईनाथनगर, वडगाव शेरी), निहाल ऊर्फ मनोज नागनाथ गायकवाड (वय २७), प्रशांत पवार (वय २५), अक्षय चव्हाण असे गुन्हा दाखल करण्यात आलेल्या आरोपींची नावे आहेत. याप्रकणी सचिन संजय गायकवाड (वय २४, रा. साईनाथनगर, वडगावशेरी) यांनी चंदननगर पोलीस ठाण्यात फिर्याद दिली आहे.
पोलिसांनी दिलेल्या माहिती नुसार, फिर्यादी सचिन गायकवाड आणि आरोपी रोहन गायकवाड हे शेजारी राहण्यास आहेत. फिर्यादी हे त्यांच्या मित्रासह घरात झोपले असताना रोहन त्यांच्या साथीदारांना घेऊन आला. फिर्यादी यांनी दरवाजा उघडला असताना त्यांना धक्का देऊन ते घरात शिरले.
‘तुझ्या घरात येवढी मुले कशसाठी आले, तुम्ही काहीतरी चोरीमारी करण्याचा प्रयत्न करीत असणार’, असे म्हणून रोहन याने फिर्यादीकडे पैशांची मागणी केली. त्यांच्या हातातील मोबाईल घेऊन त्यातून फोन पेद्वारे २० हजार रुपये जबरदस्तीने त्याचे खात्यावर ट्रान्सफर करुन घेतले. त्याच्या मित्राला मारहाण केली. त्यांच्या घरातील एलईडी टिव्ही फोडून नुकसान केले. फिर्यादीचा भाऊ आकाश गायकवाड यांच्या खिशातून इरटीगा गाडीची चावी घेऊन गाडी पळून गेले.
याप्रकणी सचिन गायकवाड यांनी फिर्याद दिली असून आरोपींविरोधात गुन्हा दाखल करण्यात आला आहे. या घटनेचा पुढील तपास पोलीस करीत आहेत.
