उस्मानाबाद : उदगीर- लातूर रस्त्यावरील कार आणि बसचा हैबतपुर पाटीजवळ भीषण अपघात झाल्याची घटना आज मंगळवारी (ता.४) सकाळी साडेआठ वाजण्याच्या सुमारास घडली आहे. या अपघातात ५ जण ठार तर १० हून अधिक जण गंभीर जखमी झाल्याची माहिती समोर येत आहे. तर अद्याप मृतांची ओळख पटलेली नाही.
मिळालेल्या माहितीनुसार, उदगीर येथील एका खासगी रुग्णालयातील कर्मचारी तुळजापूरला देवीच्या दर्शनासाठी गेले होते. देवीचे दर्शन घेऊन कारमधून माघारी येत असताना, उदगीरहून चाकूर दिशेने जाणाऱ्या एसटी महामंडळाच्या बसचा, उदगीर-नळेगाव रस्त्यावरील हैबतपूर पाटी जवळ बस आणि कारचा भीषण अपघात झाला. या अपघातात कारमधील पाच जण जागीच ठार झाले असून, बसमधील दहा जण जखमी झाले त्यांना उदगीर येथील शासकीय रुग्णालयात उपचारासाठी दाखल करण्यात आले आहे.
दरम्यान, या अपघाताची माहिती समजताच घटनास्थळी स्थानिक नागरिकांनी व उदगीर ग्रामीण पोलिसांनी तातडीने धाव घेत मदतकार्य केले. सर्वांनी मिळून बचाव कार्यास प्रारंभ केला. काही जखमींना प्रथमोपचार दिले. सद्यस्थितीत ५ जणांचा मृत्यू झाल्याचे समजतेच. अद्याप मृतांची ओळख पटली नसून अपघातास्थळी वाहनांच्या रांगा लागल्या आहेत.
