लहू चव्हाण
पाचगणी : मांढरदेव (ता.भोर) येथून नवरदेवाच्या लग्नाचे वऱ्हाड घेऊन निघालेल्या आयसर टेंपो पाचगणी नजीक वळणाचा अंदाज न आल्याने पलटी झाला. या अपघातात चार जण गंभीर जखमी झाले असून २१ जण जखमी झाले आहेत.
जखमींवर पाचगणी येथील बेल एअर हाॅस्पिटल व महाबळेश्वर येथील ग्रामीण रुग्णालयात उपचार सुरू आहेत.
पालाना(मांढरदेव) येथील आनंदा धोंडिबा धायगुडे यांच्या मुलाचा आज घोटेघर (ता.जावली) येथे साडेचार वाजता विवाह होता. त्यासाठी पालाना येथून टेम्पोतून (एम.एच ४३ यूव ७८६०) २५ वऱ्हाडी वाई-पाचगणी मार्गे घोटेघरच्या दिशेने जात होता.
भरधाव निघालेला टेम्पो दुपारी १२ : ५० च्या सुमारास पाचगणी येथील डॉ. निवसरकर यांच्या निवासस्थानासमोर असलेल्या वळणाचा अंदाज न आल्याने रस्त्याच्या कडेला असणाऱ्या खड्ड्यात पलटी झाला.
अपघात घडल्याची माहिती मिळताच पाचगणी येथील SOS टीमचे सदस्य, पालिका कर्मचारी व पोलीस तात्काळ घटनास्थळी दाखल झाले. त्यांनी रुग्णवाहिका बोलावून गंभीर जखमींना बेल एअर हाॅस्पिटल तर किरकोळ जखमींना महाबळेश्वर येथील ग्रामीण रुग्णालयात दाखल केले.
