सांगली : बायकोला नांदायला पाठवत नाही, या रागातून एका जावयाने आपल्या सासऱ्याचा खून केल्याचा धक्कादायक प्रकार सांगलीच्या जत तालुक्यातील दरीबडची येथे घडला आहे.
आप्पासो मल्लाड असं मृत सासऱ्याचं नाव आहे. याप्रकरणी जावई सचिन बळोळीसह चार जणांविरोधात जत पोलीस ठाण्यात गुन्हा दाखल करण्यात आला.
पोलिसांनी दिलेल्या माहितीनुसार, आप्पासो पाटील यांची मुलगी तेजश्रीने दीड वर्षांपूर्वी कर्नाटकमधील अथणी तालुक्यातील एगळी गावातल्या सचिन बळोळी याच्याशी लग्न केलं होतं. मात्र लग्नानंतर या दोघांमध्ये वाद सुरू झाले.
घरगुती वादामुळे गेल्या सहा महिन्यांपासून तेजश्री आपल्या माहेरी सांगलीत राहत होत्या. पती-पत्नींमधील वाद वाढला असून तेजश्रीने घटस्फोटासाठी जत न्यायालयात अर्ज दाखल केला आहे.
तिच्या पतीचा घटस्फोट देण्यास नकार आहे. तिचा पती सचिन बळोळीने घटस्फोट देत नसल्याचं सांगत पत्नीला नांदायला पाठवा, अशी मागणी वारंवार पत्नीच्या माहेरच्या मंडळींकडे केली होती. पण सासरे आप्पासो मल्लाड हे आपल्या बायकोला नांदायला पाठवत नाही, असा समज जावई सचिन बळोळी यांच्या मनात निर्माण झाला होता.
दरम्यान, शुक्रवारी रात्रीच्या सुमारास सचिन बळोळीने आपला भाऊ मिलन बळोळी आणि इतर दोघांसह कट रचला. त्यावेळी जावई सचिन आणि त्याचा भाऊ मिलन दोन माणसांसह कोयते घेऊन शेतात आले आणि त्यांनी तेजश्रीच्या वडिलांच्या डोक्यात, कानावर चेहऱ्यावर, हातावर, मानेवर मारहाण केली. त्यांचा आवाज ऐकून तेजश्रीची आई शेतात आली, तिने बॅटरीच्या प्रकाशात हा प्रकार पाहिला, असा जबाब तिने पोलिसांना दिला आहे.
सासऱ्याची हत्या केल्यानंतर जावई फरार झाला असून या प्रकरणी जत पोलीस ठाण्यामध्ये सासऱ्याच्या हत्या प्रकरणी जावयासह चौघांविरोधात गुन्हा दाखल करण्यात आला आहे.
