पुणे : नवले पुलावरील भूमकर चौकात डंपर व दुचाकी यांच्यात झालेल्या भीषण अपघातात दुचाकीस्वाराचा जागेवरच मृत्यू झाला आहे. डंपर चालकाचे नियंत्रण सुटल्यामुळे अपघात झाल्याची माहिती मिळत आहे. या अपघातानंतर डंपरचा चालक फरार झाला असून पोलीस त्याचा शोध घेत आहेत.
निखिल गोविंद राठोड असे मृत्यू झालेल्या तरुणाचे नाव आहे.
पोलिसांनी दिलेल्या माहितीनुसार, नवले पुलावरील भूमकर चौकात भूमकर पुलाकडून हायवेकडे जाणाऱ्या सर्विस रोडवर, ग्रॅडूप सोसायटीसमोर अशोक लेलँड कंपनीचा डंपर भरधाव वेगाने निघाला होता. याचवेळी दुचाकीवर निखील राठोड हा तरुण त्याच्या दुचाकीवरून त्याच बाजूने निघाला होता.
डंपर भरधाव असल्याने डंपर चालकाचे नियंत्रण सुटले व त्याची जोरदार धडक दुचाकीला बसली यामध्ये निखिल राठोडचा जागेवरच मृत्यू झाला. असा प्राथमिक अंदाज पोलिसांकडून वर्तवला जात आहे.
दरम्यान, नवले पूल आणि भूमकर चौकात काही महिन्यांपूर्वी नवले पुलावर तब्बल ३२ गाड्या एकमेकांना धडकल्यानंतर जणू काही अपघाताची मालिका सुरू झाली आहे. एका आठवड्यात नवले पूल आणि भूमकर चौकात किरकोळ आणि मोठे असे १५ ते २० अपघात सलग झाले आहेत.
यानंतर प्रशासनाला तातडीने जाग आली आणि अनेक ठिकाणी अपुरी असलेली काम पूर्ण करण्यात आली. त्यातच मुख्य हायवेवरून जात असताना भरधाव वेगात असणाऱ्या डंपरच्यामध्ये एक दुचाकीस्वार अचानक आल्याने त्याला डंपरचा धक्का लागला आणि नियंत्रण सुटल्याने डंपर त्याच्या अंगावरून गेला.
