पुणे : फुड पार्सल देण्यासाठी मुलींच्या वसतीगृहातील रुमवर जाण्यास मनाई केल्याने साथीदारांना बोलावून डिलिव्हरी बॉयने वसतीगृहाचे मॅनेजर व सिक्युरिटी गार्डला लाकडी दांडक्याने जबर मारहाण केल्याची घटना उघडकीस आली आहे. ही घटना वडगाव शेरी येथील स्मार्ट लिव्ह इन पीजीमध्ये बुधवारी (ता. १५) रोजी रात्री पावणेदहा वाजता घडली आहे.
याप्रकरणी गणेश बाळासाहेब साबळे (वय २७, रा. सुनितानगर, वडगाव शेरी) यांनी येरवडा पोलीस ठाण्यात फिर्याद दिली आहे. त्यानुसार पोलिसांनी रोहन बाळु व त्यांच्या इतर ६ साथीदारांवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी हे स्मार्ट लिव्ह इन पीजी या मुलींच्या वसतीगृहाचे मॅनेजर आहेत. एक डिलिव्हरी बॉय फुड पार्सलची डिलिव्हरी करण्यासाठी तेथे आला होता. तो जबरदस्तीने मुलींचे पीजीवर जाण्याचा प्रयत्न करु लागल्याने तेथील सिक्युरिटी गार्ड दीपक मंडल याने त्याला अडवले. आरोपीने सिक्युरिटी गार्डला शिवीगाळ करुन हाताने मारहाण केली.
त्यावेळी फिर्यादी तेथे आले. तेव्हा फिर्यादीने रोहन बाळु यास कानाखाली देऊन तेथून जाण्यास सांगितले. त्याचा राग मनात धरुन तो तेथून निघून गेला. त्यानंतर आरोपी रोहन बाळु थोड्या वेळाने इतर साथीदारांना घेऊन तेथे आला. पीजीचे पार्किंगमध्ये त्यांनी फिर्यादी यांना लाकडी दांडक्याने, हाताने जबर मारहाण केली.
दरम्यान, याप्रकरणी गणेश साबळे यांनी येरवडा पोलीस ठाण्यात फिर्याद दिली. त्यानुसार आरोपी रोहन बाळुसह त्याच्या साथीदारांवर गुन्हा दाखल करण्यात आला असून या घटनेचा पुढील तपास पोलीस करीत आहेत.
