पुणे : चोरीच्या गुन्ह्यातील फरार आरोपीला अटक करण्यासाठी गेलेल्या महाळुंगे पोलीस ठाण्यातील पोलिसावर गुन्हेगाराने हल्ला करून अटक टाळण्यासाठी स्वत:च्या हातावरही ब्लेडने वार केल्याची धक्कादायक घटना देहूरोड येथील सेंट्रल चौकात मंगळवारी (ता.२१) दुपारी सव्वा तीन वाजण्याच्या सुमारास घडली.
याप्रकरणी संतोष रामदास काळे (वय-३५ रा. देहुगाव) यांनी देहुरोड पोलीस ठाण्यात फिर्याद दिली आहे. त्यानुसार जलसिंग राजपुतसिंग दुधानी (वय-३५ रा. जांभुळगाव ता. मावळ) याच्यावर गुन्हा दाखल करण्यात आला आहे.
पोलिसांनी दिलेल्या माहितीनिसार, आरोपी जलसिंग दुधानी याच्यावर महाळुंगे पोलीस ठाण्यात चोरीसह इतर गुन्हे दाखल आहेत. पोलिसांनी केलेल्या तांत्रिक तपासात आरोपी मुंबई-पुणे जुन्या महामार्गावरील देहुरोड येथील सेंट्रेल चौकात असल्याची माहिती पोलिसांना मिळाली होती. मिळालेल्या माहितीच्या अनुषंगाने पोलीस कर्मचारी संतोष काळे हे आरोपीला अटक करण्यासाठी गेले होते.
दरम्यान, आरोपी जलसिंग दुधानी हा अटक टाळण्यासाठी पोलिसांच्या अंगावर धावून गेला. तसेच आरोपीने त्याच्याजवळ असलेल्या ब्लेडने पोलीस कर्मचारी संतोष काळे यांच्या तोंडावर वार करण्याचा प्रयत्न केला. तसेच मला पकडले तर तुम्हाला दाखवतो, मी आत्महत्या करतो, असे म्हणत आरोपीने स्वत:च्या हातावर ब्लेडने वार करुन घेतले.
याप्रकरणी पोलिसांनी आरोपी जलसिंग दुधानी ताब्यात घेतले आहे. त्याला उपचारासाठी ससून हॉस्पिटलमध्ये दाखल करण्यात आले आहे. देहूरोड पोलीस ठाण्यात आरोपी जलसिंग दुधानी याच्यावर गुन्हा दाखल करण्यात आला आहे. पुढील तपास पोलीस उपनिरीक्षक थिटे करीत आहेत.
