पिंपरी : पेट्रोलपंपावरील अकरा लाखांपेक्षा जास्त रकमेचा भरणा करण्यासाठी गेलेल्या कर्मचाऱ्याला पिस्तुलाचा धाक दाखवून लुटण्याचा प्रयत्न करणाऱ्या चोरट्याला एका महिला पोलीस कर्मचाऱ्याने नागरिकांच्या मदतीने पकडले आहे. हि घटना आकुर्डी येथील खंडोबामाळ चौकातील तुळजा भवानी मंदिराजवळ सोमवारी (ता. २६) घडली आहे.
सरस्वती काळे असे कर्तबगार महिला पोलीस कर्मचाऱ्याचे नाव आहे. तर पोलिसांनी चोरट्यासह त्याच्या एका साथीदाराला अटक केली आहे.
निगडीचे वरिष्ठ पोलीस निरीक्षक रंगनाथ उंडे यांनी दिलेल्या माहितीनुसार, नवरात्रोत्सवानिमित्त आकुर्डी येथील खंडोबा माळ चौकातील तुळजा भवानी मंदिराजवळ पोलीस बंदोबस्त तैनात करण्यात आला आहे. सोमवारी ( ता. २६) दुपारी तुळजा भवानी मंदिराजवळ बंदोबस्तावर निगडी पोलीस ठाण्याच्या महिला कर्मचारी सरस्वती काळे होत्या. त्यावेळी आकुर्डी येथील एका पेट्रोलपंपाची ११ लाखांपेक्षा जास्तीची रक्कम महाराष्ट्र बँकेच्या खंडोबामाळ चौकाजवळील शाखेत भरणा करण्यासाठी पेट्रोलपंपाचे कर्मचारी आले.
दरम्यान, पेट्रोलपंपावरील कर्मचारी बँकेच्या पायऱ्या चढून जात असताना, एका चोरट्याने त्यांना पिस्तुलाचा धाक दाखवून त्यांच्याकडे असलेली रोकड बॅग हिसकावण्याचा प्रयत्न केला. चोरट्याच्या हातात पिस्तूल पाहून तेथील नागरिकांची धावाधाव सुरू होऊन गोंधळ उडाला. या घटनेची माहिती बंदोबस्तावरील सरस्वती काळे यांना मिळताच, त्यांनी लगेच बँकेजवळ धाव घेतली. त्यावेळी पेट्रोलपंपाचा कर्मचारी आणि चोरट्या झटापट सुरू होती.
पोलीस कर्मचारी सरस्वती काळे यांना नागरिकांच्या मदतीने चोरट्याला पकडले. आणि त्याच्याकडील पिस्तूल ताब्यात घेतले. त्यानंतर निगडी पोलिसांनी घटनास्थळी धाव घेऊन चोरट्याला ताब्यात घेतले. त्याच्याकडून पिस्तूल, चार जिवंत काडतुसे, मिरचीपूड मिळून आली.
दरम्यान, चार जिवंत काडतुसे असलेले पिस्तूल चोरट्याच्या हातात होते. तरीही न घाबरता महिला पोलीस कर्मचारी सरस्वती काळे यांनी प्रसंगावधान राखत नागरिकांच्या मदतीने चोरट्याच्या हातातील पिस्तूल काढून घेऊन त्याला पकडले. या धाडसाचे शहर पोलीस दलातून सरस्वती काळे यांचे कौतूक होत आहे. तसेच पोलीस आयुक्त अंकुश शिंदे यांनी या धाडसाबद्दल सरस्वती काळे यांना १० हजारांचा रिवॉर्ड जाहीर केला आहे. मंगळवारी निगडी पोलीस ठाण्यात सरस्वती काळे यांचा सन्मान करण्यात येणार आहे.
