पुणे : लोहगड किल्ला हत्या प्रकरणाने आता एक वेगळे वळण घेतले असून, यात रोज नवे आणि धक्कादायक खुलासे समोर येत आहेत. व्यावसायिक केतन अग्रवाल याला कड्यावरून ढकलून मारल्याच्या आरोपाखाली पोलिसांनी सिया गोयल आणि तिचा प्रियकर चेतन चौधरी यांना ताब्यात घेतले आहे. सध्या पोलीस या प्रकरणाचे भक्कम पुरावे गोळा करत आहेत.या तपासादरम्यान पोलिसांच्या हाती एक अतिशय महत्त्वाचा धागा लागला आहे.
ज्यावेळी लोहगडावर घटना घडली त्या वेळी घटनास्थळाच्या परिसरात हुडी घातलेला एक तरुण दिसला होता, जो चेतन चौधरी असल्याचा संशय आहे. मात्र, पोलिसांनी जेव्हा सीसीटीव्ही फुटेज तपासले, तेव्हा एक वेगळीच माहिती समोर आली. चेतन घरातून निघताना भलत्याच कपड्यांमध्ये होता, पण लोहगड परिसरात मात्र तो हुडी घातलेल्या अवस्थेत दिसला. गुन्ह्याची ओळख लपवण्यासाठी चेतनने आपले कपडे बदलले असावा, असा पोलिसांना दाट संशय आहे. त्यामुळे आता पोलिसांनी त्याच्या त्या मूळ कपड्यांचा शोध घेण्यास सुरुवात केली आहे.
या हत्येमागील मूळ कारण आणि आर्थिक बाजू समजून घेण्यासाठी पोलीस आता आरोपींच्या बँक खात्यांची कसून चौकशी करत आहेत. त्यांचे ऑनलाइन व्यवहार, बँक ट्रान्झॅक्शन्स आणि इतर डिजिटल पुरावे तपासले जात आहेत. या आर्थिक देवाणघेवाणीतून हत्येचा नेमका हेतू स्पष्ट होईल, असा विश्वास पोलिसांना आहे.
काय आहे नेमके प्रकरण?
18 जून रोजी केतन अग्रवाल हा सिया गोयलसोबत लोहगड किल्ल्यावर गेला होता. तिथेच कड्यावरून पडून त्याचा मृत्यू झाला. सियाने सुरुवातीला हा अपघात असल्याचे भासवून पोलिसांची दिशाभूल करण्याचा प्रयत्न केला. मात्र, पोलिसांच्या चौकशीत तिचा हा बनाव उघडा पडला.
पोलिसांनी नुकतेच सिया आणि चेतनला लोहगड किल्ल्यावर नेऊन घटनाक्रम कसा घडला याचे प्रात्यक्षिक केले. यामध्ये केतनचा एक डमी पुतळा कड्यावरून खाली ढकलून पाहण्यात आला. या संपूर्ण प्रकरणाचा तपास पोलीस आता युद्धपातळीवर करत आहेत.यातून आता लोहगडावरील ‘हुडी मॅन’ आणि चेतनने घातलेले कपडे पूर्ण वेगळे असल्याचा संशय आल्याने या प्रकरणाला धक्कादायक वळण लागलं आहे.
