यवत, ता. 23 : वाखारी (ता. दौंड) येथे कॅनॉललगत ओढ्याच्या कडेला सुरू असलेल्या गावठी हातभट्टी दारू निर्मितीच्या अड्ड्यावर यवत पोलिसांनी 21 ऑगस्ट रोजी दुपारी छापा टाकून सुमारे दोन हजार लिटर रसायनासह 76 हजार 500 रुपयांचा मुद्देमाल जप्त केला. पोलिसांची चाहूल लागताच संशयित आरोपी पसार झाला.
स्वप्निल सुनील नानावत (रा. चौबेमळा, यवत) हा कॅनॉललगत गावठी हातभट्टी लावून दारू गाळत असल्याची गोपनीय माहिती पोलिसांना मिळाली होती. त्यानुसार पोलिसांच्या पथकाने पंचांसह घटनास्थळी छापा टाकला. पोलिसांना त्याठिकाणी दोन मोठ्या लोखंडी बॅरलमध्ये सुमारे दोन हजार लिटर गावठी दारू तयार करण्याचे रसायन, अॅल्युमिनियमची थाळी, पाईप असलेले उपकरण आणि लाकडी सरपण असा मुद्देमाल आढळला. पोलिसांची चाहूल लागताच स्वप्निल नानावत हा कॅनॉललगतच्या काटवणातून पळून गेला.
पोलिसांनी रसायनाचा नमुना बाटलीत घेतला असून उर्वरित रसायन नष्ट करण्यात आले. तसेच हातभट्टीची साधने फोडून नष्ट करण्यात आली आणि सरपण जाळून टाकण्यात आले. याप्रकरणी यवत पोलीस ठाण्यात भारतीय न्याय संहिता कलम 123 तसेच महाराष्ट्र दारूबंदी अधिनियम 1949 चे कलम 65 (ख), (ग), (च) अन्वये गुन्हा दाखल करण्यात आला आहे. फरार आरोपीचा शोध सुरू असून पुढील तपास पोलीस हवालदार करे करीत आहेत.
