मुंबई : कल्याणमधील मलंगगड येथील कुशिवली गावच्या हद्दीत निर्जन ठिकाणी तरुण-तरुणीचा मृतदेह झाडाला लटकलेल्या अवस्थेत आढळल्याने परिसरात खळबळ उडाली आहे. या घटनेची माहिती हिललाईन पोलिसांना मिळताच त्यांनी तात्काळ त्या ठिकाणी धाव घेतली.हे दोन्ही मृतदेह ताब्यात घेत शवविच्छेदनासाठी उल्हासनगरच्या शासकीय मध्यवर्ती रूग्णालयात पाठवले आहेत. पोलीस या प्रकरणाचा पुढील तपास करत आहेत.
याबाबत मिळालेल्या माहितीनुसार, दोघे प्रेमीयुगल असल्याचा प्राथमिक अंदाज पोलिसांनी व्यक्त केला आहे. त्यांची ओळख अद्याप पटलेली नसून पोलीस अधिक तपास करत आहेत. प्रेम प्रकरणातून ही आत्महत्या केली असावी, असाही प्राथमिक अंदाज पोलिसांनी व्यक्त केला आहे. घटनास्थळावरील दुचाकी देखील पोलिसांनी ताब्यात घेतली आहे . हे दोघेजण याच दुचाकीवरून आल्याचा पोलिसांचा अंदाज आहे.
दरम्यान घटनास्थळावरून दुचाकी आणि बॅग देखील सापडल्याने हे दोघे इतर ठिकाणाहून आल्याचा अंदाज वर्तवला जात आहे. पोलीस या दोघांची ओळख पटवण्याचा प्रयत्न करत आहेत. तसेच या दोघांनी आत्महत्यासारखे पाऊल का उचलले याचा शोध घेतला जात आहे.
