अक्षय टेमगिरे
Shirur News : शिरूर, (पुणे) : शिरूर शहरातील आनंद सोसायटी परिसरात घरकाम करणाऱ्या नोकरानेच मालकाच्या घरातून तब्बल 24 लाख रुपयांचे सोन्या-चांदीचे दागिने आणि चांदीच्या वस्तू लंपास केल्याची घटना उघडकीस आली आहे. शिरूर पोलीस स्टेशनच्या डी.बी. पथकाने परजिल्ह्यात जाऊन आरोपीला जेरबंद करत चोरीचा मुद्देमाल हस्तगत केला आहे.
मिळालेल्या माहितीनुसार, मौजे शिरूर येथील आनंद सोसायटी, येथे राहणारे नितीन मोतीलाल मुथ्था यांच्या घरातून दिनांक ४ फेब्रुवारी ते २३ फेब्रुवारी २०२६ दरम्यान सोन्याचे दागिने, चांदीची भांडी व इतर मौल्यवान साहित्य चोरीला गेले होते. या प्रकरणात घरात काम करणारे कामगार विलास आनंदा खोसडे व सारजा विलास खोसडे रा. भायेगाव, ता. जि. नांदेड यांनी फिर्यादीच्या संमतीशिवाय लबाडीच्या उद्देशाने चोरी केल्याची तक्रार शिरूर पोलीस ठाण्यात दाखल करण्यात आली होती.
नितीन मोतीलाल मुथ्था यांच्या तक्रारीवरून शिरूर पोलीस स्टेशन येथे भारतीय न्याय संहितेच्या वेगवेगळ्या कलमान अन्वये गुन्हा दाखल करण्यात आला होता. गुन्ह्याचे गांभीर्य लक्षात घेऊन पोलीस निरीक्षक संदेश केंजळे यांनी तपास पथकाला आरोपींचा शोध घेण्याच्या सूचना दिल्या. तांत्रिक विश्लेषण आणि गोपनीय माहितीच्या आधारे आरोपी विलास आनंदा खोसडे हा जांब, ता. मुखेड, जि. नांदेड येथे असल्याची माहिती मिळाल्यानंतर पोलीस पथकाने सापळा रचत त्याला ताब्यात घेतले आहे.
या कारवाईदरम्यान पोलिसांनी चोरीस गेलेल्या सुमारे २४ लाख रुपये किंमतीच्या ७ किलो १३४ ग्रॅम वजनाच्या चांदीच्या वस्तू व दागिने तसेच ३६ ग्रॅम सोन्याचे दागिने जप्त करण्यात यश मिळवले आहे.
ही उल्लेखनीय कारवाई वरिष्ठांच्या मार्गदर्शनाखाली पोलीस निरीक्षक संदेश केंजळे यांच्या निजोजानानुसार शिरूर पोलीस स्टेशनच्या डी.बी. पथकाने केली असुन या पथकात पोलीस उपनिरीक्षक शुभम चव्हाण, पोलीस हवालदार अक्षय कळमकर तसेच पोलीस अंमलदार नितेश थोरात, विजय शिंदे, निरज पिसाळ, सचिन भोई, निखील रावडे, अंबादास थोरे, रविंद्र काळे, दादाराव नागरे व अजय पाटील यांनी सहभाग घेत कामगिरी यशस्वीरित्या पार पाडली आहे.
घटनेचा पुढील तपास शिरूर पोलीस स्टेशनचे पोलीस निरीक्षक संदेश केंजळे यांच्या मार्गदर्शनाखाली पोलीस उपनिरीक्षक शुभम चव्हाण हे पुढील तपास करत आहेत.
