Shirur News : सणसवाडी : शिरूर तालुक्यातील सणसवाडीमधील नरके वस्ती याठिकाणी घरगुती गॅस सिलेंडरचा स्फोट होऊन संपूर्ण घर आगीच्या भक्ष्यस्थानी आल्याची धक्कादायक घटना नुकतीच घडली आहे. या घटनेत संसारोपयोगी वस्तू, कपडे, शैक्षणिक साहित्य, कागदपत्रे जळून खाक झाली. सुदैवाने या घटनेत कोणतीही जीवितहानी झाली नाही.
आर्थिक मदत करण्याचे आवाहन
सणसवाडी येथे राजाराम नरके यांच्या घरातील गॅस सिलेंडरचा स्फोट होऊन वस्तू जळून खाक झाल्या. जुन्या कौलारू पद्धतीचे घर असल्याने आगीने रुद्र रूप धरण केले. दरम्यान, आग लागल्याची माहिती मिळताच अग्निशमन दलाची गाडी घटनास्थळी दाखल झाली. आग नियंत्रणात आणण्यासाठी अथक प्रयत्न करण्यात आले. सुदैवाने यामध्ये कोणतीही जीवितहानी झाली नाही. गॅस सिलेंडरच्या स्फोटामुळे परिसरात भीतीचे वातावरण निर्माण झाले आहे.
दरम्यान, घटनेची माहिती मिळताच शिक्रापूर पोलीस स्टेशनचे अधिकारी आणि कर्मचाऱ्यांनी घटनास्थळी धाव घेतली. आपल्या डोळ्यांदेखत आपण उभ्या केलेल्या संसाराची राखरांगोळी झालेली पाहून राजाराम नरके यांना अश्रू अनावर झाले. स्थानिक प्रतिनिधी आणि नागरिकांनी त्यांचे सांत्वन करत, आर्थिक मदत करण्याचे आवाहन केले आहे.
