शिरूर: शिरूर पोलीस ठाण्यात 2017 मध्ये दाखल असलेल्या गुन्ह्याचा महत्त्वाचा निकाल मंगळवारी (ता.19) लागला असून, डंबेनाला (ता. शिरूर) येथील सुरेश ज्ञानोबा ओतारी (वय ६१) यांना शिरूर न्यायालयाच्या मा.झारी यांच्या कोर्टाने सहा महिन्यांची सक्त मजुरीची शिक्षा सुनावली आहे.
शिरूर पोलीस ठाण्यात सन-2017 मध्ये सुरेश ओतारी यांच्या विरोधात गुन्हा दाखल करण्यात आला होता. त्यामध्ये सुरेश ओतारी यांनी फिर्यादीला घरात घुसून त्यांच्यासोबत वाद घातला होता आणि मारहाण करून फिर्यादीला गंभीर जखमी केले होते. या गुन्ह्या अंतर्गत विविध गंभीर कलमांखाली ओतारी यांच्या विरोधात शिरूर पोलीस ठाण्यात गुन्हा नोंदवण्यात आला होता. त्यानंतर हे प्रकरण न्यायालयात गेले होते.
दरम्यान याप्रकरणी युक्तिवादानंतर या प्रकरणाच्या न्यायालयीन सुनावणीच्या वेळी शिरूर न्यायालयाच्या मा.झारी यांच्या कोर्टाने आरोपी सुरेश ओतारी यांना भादंवि कलम- 323 आणि कलम-452 अंतर्गत दोषी ठरवत, प्रत्येकी सहा महिने सक्त मजुरीची शिक्षा ठोठावली. मा.झारी सो.यांच्या कोर्टाने आरोपीला शिक्षा ठोठावून या खटल्याचा निकाल जाहीर केला आहे.
शिरूर न्यायालयात सुरू असलेल्या खटल्याची सरकारी वकील सागर वसंत कदम यांनी सरकारी बाजू प्रभावीपणे मांडली. न्यायालयीन कार्यवाही दरम्यान पोलीस निरीक्षक संदेश केंजळे, संतोष घोळवे तसेच पोलीस उपनिरीक्षक हणमंत नकाते आणि पोलीस हवालदार उमेश भगत यांनी तपासी चौकशी अधिकारी म्हणून काम पाहिले. न्यायालयात अंमलदार म्हणून पोलीस हवालदार तुकाराम गोरे आणि महिला पोलीस मनीषा फंड यांची नियुक्ती करण्यात आली होती.
