पुणे : महाराष्ट्र संघटीत गुन्हेगारी नियंत्रण अधिनियम (मोक्का) गुन्ह्यातील फरार असलेल्या सराईत आरोपीला एमआयडीसी पोलिसांनी भांडेवाडी परिसरातून जेरबंद केले आहे.
शशिकांत सावता चव्हाण (रा. आंबीजळगाव, ता. कर्जत, जि. अहमदनगर) असे अटक करण्यात आलेल्या आरोपीचे नाव आहे.
कर्जत पोलीस ठाण्याचे वरिष्ठ पोलीस निरीक्षक चंद्रशेखर यादव यांनी दिलेल्या माहितीनुसार, एमआयडीसी पोलीस ठाण्याच्या हद्दीत मारहाण करून किमती ऐवज लुटल्याबाबत गुन्हा दाखल करण्यात आला होता. याप्रकरणी शशिकांत चव्हाण याच्यावर आदी कलमान्वये गुन्हा दाखल करण्यात आला होता. या गुन्ह्यात आरोपीविरूध्द वाढीव मोक्का कलमान्वये कारवाई करण्यात आली होती. सदर गुन्ह्यात चव्हाण हा पसार होता.
दरम्यान, सदर आरोपीला पकडण्याच्या सूचना एमआयडीसी पोलिसांना वरीष्ठांनी दिल्या होत्या. तसेच एमआयडीसी पोलीस ठाण्याचे सहाय्यक पोलीस निरीक्षक युवराज आठरे यांनी सुद्धा सदर आरोपी अटक करणे बाबत वेळोवेळी कर्जत पोलिसांना संपर्क केला होता. त्यानुसार गुन्हे शोध पथकातील अधिकारी व कर्मचारी यांनी पाळत ठेऊन मंगळवारी (ता. ३०) आरोपी शशिकांत चव्हाण हा भांडेवाडी परिसरात येणार असल्याची माहिती मिळाल्याने त्यास सापळा लावून पकडले. व त्यास पुढील तपासासाठी एमआयडीसी पोलीस ठाण्याच्या ताब्यात दिले आहे.
सदरची कामगिरी कर्जत पोलीस ठाण्याचे पोलीस निरीक्षक चंद्रशेखर यादव, एमआयडीसी पोलीस स्टेशनचे सहाय्यक पोलीस निरीक्षक युवराज आठरे पोलीस उपनिरीक्षक अनंतराव सालगुडे, पोलीस अमलदार पांडुरंग भांडवलकर, श्याम जाधव, गोवर्धन कदम, ईश्वर माने, अमित बर्डे, मनोज लातूरकर, शकील बेग आदींनी केली आहे. पुढील तपास उपविभागीय पोलीस अधिकारी नगर ग्रामीण अजित पाटील हे करत आहेत.
