Saswad News सासवड , ता. ८ : सासवड(ता. पुरंदर) बसस्थानकावर एसटी बसमध्ये चढताना झालेल्या गर्दीचा फायदा घेत अज्ञात चोरट्याने महिलेच्या गळ्यातील तब्बल २.२ तोळ्यांचे सोन्याचे गंठण व डोरले लंपास केल्याची धक्कादायक घटना घडली आहे. ३ मे २०२६ रोजी दुपारी चारच्या सुमारास हि घटना घडल्यामुळे प्रवाशांमध्ये भीतीचे वातावरण निर्माण झाले आहे. सासवड पोलिसांनी अज्ञात चोरट्याविरोधात गुन्हा दाखल करून तपास सुरू केला आहे. Saswad News
पोलिसांनी दिलेल्या माहितीनुसार, फिर्यादी महिला आपल्या कुटुंबासह पांगारे परिसरात राहतात व शेती करून उदरनिर्वाह करतात. त्या सासवड बसस्थानकावरून वीरकडे जाणाऱ्या एसटी बसची वाट पाहत उभ्या होत्या. सुमारे ४:१५ वाजण्याच्या सुमारास बस आल्यानंतर प्रवाशांनी गाडीत चढण्यासाठी एकच गर्दी केली. महिलाही त्या गर्दीतून गडबडीत बसमध्ये चढून सीटवर जाऊन बसल्या. Saswad News
दरम्यान, बस पिंपळे परिसरात पोहोचल्यानंतर त्यांनी गळ्यातील सोन्याचे गंठण तपासले असता ते गायब असल्याचे त्यांच्या लक्षात आले. त्यांनी बसमधील प्रवाशांकडे विचारपूस केली, मात्र कोणतीही माहिती मिळाली नाही. त्यानंतर त्या पांगारे येथे गेल्यानंतर कुटुंबीयांना प्रकार सांगून सासवड पोलीस ठाण्यात धाव घेतली. चोरीस गेलेल्या दागिन्यांमध्ये सुमारे २.२ तोळे वजनाचे सोन्याचे गंठण व डोरले असून त्याची सध्या चालू बाजार भावाप्रमाणे ३ लाखांहून अधिक रक्कम होत आहे.
या प्रकरणी सासवड पोलीस ठाण्यात भारतीय न्याय संहिता २०२३ च्या कलम ३०३(२) अंतर्गत अज्ञात चोरट्याविरोधात गुन्हा दाखल करण्यात आला असून बसस्थानक परिसरातील सीसीटीव्ही फुटेज तपासले जात आहेत. गर्दीच्या ठिकाणी महिलांनी दागिन्यांची काळजी घ्यावी, असे आवाहन पोलिसांनी केले आहे.
