नागपूर : नागपूर-तुळजापूर राष्ट्रीय महामार्गावर यवतमाळ नजीकच्या किन्ही गावाजवळील उड्डाणपुलावर एक दुर्दैवी आणि भीषण अपघात घडला आहे. रस्त्यावर अचानक आलेल्या मोकाट जनावराला वाचवण्याच्या प्रयत्नात दोन कारची जोरदार धडक झाली. या घटनेत एका वृद्ध महिलेचा जागीच दुर्दैवी अंत झाला असून अन्य 3 प्रवाशी गंभीर जखमी झाले आहेत.
महामार्गावरील उड्डाणपुलावरून वाहने जात असताना अचानक एक मोकाट जनावर समोर आले. त्याला वाचवण्यासाठी पुढील कारचालकाने तातडीने ब्रेक दाबला. मात्र, वेगात असलेल्या मागील कारचा ताबा सुटला आणि ती पुढील वाहनावर थेट जाऊन धडकली. धडक इतकी भीषण होती की, एक कार रस्त्याच्या कडेला फेकली जाऊन 3 ते 4 वेळा उलटली.
घटना घडताच किन्ही गावातील स्थानिकांनी तात्काळ अपघातस्थळी धाव घेतली. कारचा चक्काचूर झालेला दरवाजा तोडून गावकऱ्यांनी आत अडकलेल्या जखमींना बाहेर काढले. जीवन राठोड, अरुण देवक, गोलू कुलरकर, अथर्व गायधने, यश सोनटक्के, मोहन जाधव, सचिन मोहरकर आणि रघु राठोड या ग्रामस्थांनी बचावकार्यात मोलाची मदत केली.
या अपघाताची माहिती रघु राठोड यांनी यवतमाळ ग्रामीण पोलिसांना दिली. माहिती मिळताच पोलिसांनी घटनास्थळी पोहोचून पंचनामा केला आणि जखमींना तात्काळ यवतमाळच्या शासकीय रुग्णालयात उपचारासाठी हलवले.या महामार्गावर मोकाट जनावरांमुळे अपघात होण्याची ही पहिलीच वेळ नाही. यापूर्वीही अशा अनेक दुर्घटना घडल्या असल्याने परिसरातील नागरिकांमध्ये तीव्र संताप व्यक्त केला जात आहे.
भविष्यातील संभाव्य धोके टाळण्यासाठी प्रशासनाने महामार्गावरील मोकाट जनावरांचा तात्काळ आणि कायमस्वरूपी बंदोबस्त करावा, अशी जोरदार मागणी ग्रामस्थांकडून केली जात आहे. घटनेचा पुढील तपास यवतमाळ ग्रामीण पोलीस करत आहेत.
