( Samruddhi Mahamarg )छत्रपती संभाजीनगर : समृद्धी महामार्गावर ( Samruddhi Mahamarg )भरधाव इर्टिगा कार उलटून गाडीचा भीषण अपघात झाल्याची धक्कादायक घटना शिवणी पिसा ते दुसरबीड दरम्यान (ता. लोणार) येथे आज रविवारी (ता.१२) सकाळच्या सुमारास घडली. या अपघातात सहा जण जागीच ठार झाले आहेत, तर सहा जण जखमी झाले आहेत.
मेहकरजवळ सिवनी पिसा गावाजवळ अपघात…
मिळालेल्या माहितीनुसार, इर्टिगा कार औरंगाबादच्या दिशेने चालली होती. भरधाव वेगातील इर्टिगा गाडी ही रस्त्याच्या मधोमध असलेल्या डिव्हायडरमध्ये घुसली व तीन ते चार पलट्या मारून दुसऱ्या बाजूच्या रस्त्यावर उलटली. मेहकरजवळ सिवनी पिसा गावाजवळ नागपूर कॉरिडॉरवर गाडीचा अपघात झाला. या अपघातामध्ये चार जण घटनास्थळीच ठार झाले तर दोन जणांचा रुग्णालयात उपचारादरम्यान मृत्यू झाला.
अपघाताची माहिती मिळाल्यानंतर पोलीस घटनास्थळी दाखल झाले. जखमींवर मेहकर येथील रुग्णालयात उपचार सुरू आहेत. बहुतांश जखमी हे छत्रपती संभाजीनगर शहरातील एन ११ मधील रहिवाशी असल्याची माहिती मिळाली आहे.
दरम्यान, या अपघातातील गंभीर जखमींना आता तेथून अन्यत्र हलविण्यात येत आहे. मृतकांची नावे अद्याप स्पष्ट झालेली नाहीत परंतू नागपूरकडून ही कार छत्रपती संभाजीनगरच्या दिशने जात होती. या वाहनामध्ये जवळपास १३ जण होते, अशी माहिती आहे. यात काही लहान मुलांचाही समावेश आहे.
