पुणे : दापोडीत पती-पत्नीची हत्या करून रक्ताने माखलेला टिकाव घेऊन रस्त्यावर फिरणाऱ्या आरोपीला भोसरी पोलिसांनी शनिवारी (ता.११) मध्यरात्री अटक केली आहे. या घटनेमुळे पुणे शहरात एकच खळबळ उडाली आहे.
शंकर नारायण काटे (वय- ६०) आणि संगीता शंकर काटे (वय- ५५) अशी हत्या झालेल्या पती- पत्नीची नावे आहेत. तर प्रमोद मगरुडकर (वय- ४७) असे अटक करण्यात आलेल्या आरोपीचे नाव आहे.
मिळालेल्या माहितीनुसार, काटे दाम्पत्य हे त्यांच्या घरात बसले होते. तेव्हा आरोपी प्रमोदने दोघांवर टीकावाने वार करून हत्या केली. हत्या केल्यानंतर आरोपी प्रमोद रक्ताने माखलेला टिकाव घेऊन रस्त्यावर फिरत होता. स्थानिक नागरिकांनी या घटनेची माहिती पोलिसांना दिली. या घटनेची माहिती मिळताच भोसरी पोलिसांनी तत्काळ येऊन आरोपीला ताब्यात घेतले आहे. मात्र अद्याप दुहेरी हत्येमागील कारण समजू शकलेले नाही.
दरम्यान, आरोपी प्रमोद हा नुकताच दिल्लीवरून आला होता. त्याचा एक व्हिडिओ सध्या सोशल मीडियावर व्हायरल होत आहे. अशी माहिती भोसरी पोलिसांनी दिली आहे. मात्र हा पूर्वनियोजित कट असण्याची शक्यता वरिष्ठ पोलिस अधिकाऱ्याने वर्तवली आहे.
